Azərbaycan torpaqlarının işğalı
Azərbaycan xalqının tarixində elə faciəli səhifələr var ki, onların ağrısı uzun illər yaddaşlardan silinmir. XX əsrin sonlarında Ermənistanın Azərbaycana qarşı başladığı hərbi təcavüz, torpaqlarımızın işğalı, dinc əhalinin öz doğma yurdlarından qovulması xalqımızın üzləşdiyi ən ağır sınaqlardan biri olmuşdur.
1988-ci ildən etibarən Ermənistanın Azərbaycana qarşı ərazi iddiaları və separatçı fəaliyyətinin genişlənməsi bölgədə vəziyyəti daha da gərginləşdirdi. Ermənistanın millətçi dairələrinin əsassız ərazi iddiaları nəticəsində yüzlərlə yaşayış məntəqəsi dağıdıldı, minlərlə insan həyatını itirdi, yüz minlərlə azərbaycanlı doğma torpaqlarından didərgin salındı. 1992-ci ildə Şuşanın, 1993-cü ildə isə digər rayonlarımızın işğalı ilə Azərbaycan ərazilərinin böyük hissəsi Ermənistanın hərbi nəzarətinə keçdi.
İşğal yalnız torpaq itkisi deyildi. Bu, həm də xalqımızın tarixi-mədəni irsinə, milli-mənəvi dəyərlərinə, iqtisadi potensialına vurulan ağır zərbə idi. Şəhər və kəndlərimiz viran qoyuldu, tarixi abidələrimiz dağıdıldı, məscidlərimiz təhqir edildi, qəbiristanlıqlarımız məhv edildi. Bir zamanlar həyatın qaynayıb-qarışdığı yurd yerlərimiz xarabalığa çevrildi.
Lakin Azərbaycan xalqı heç vaxt işğalla barışmadı. Ölkəmizin hər bir vətəndaşı torpaqlarımızın azad olunacağına inanırdı. Bu inam dövlətimizin əsas siyasi xəttinə çevrildi. Prezident İlham Əliyevin rəhbərliyi ilə Azərbaycan öz gücünü artırdı, beynəlxalq mövqelərini möhkəmləndirdi və torpaqlarımızın azadlığı üçün zəruri siyasi, iqtisadi və hərbi potensial formalaşdırdı.
2020-ci il sentyabrın 27-də başlayan Vətən müharibəsi xalqımızın illərlə gözlədiyi tarixi dönüşün başlanğıcı oldu. 44 gün davam edən müharibədə Azərbaycan Ordusu böyük qəhrəmanlıq göstərərək torpaqlarımızı işğaldan azad etdi. Noyabrın 8-də Şuşanın azad olunması müharibənin taleyini həll edən mühüm hadisəyə çevrildi.
Azərbaycan xalqı uzun illər davam edən işğala son qoymaqla öz tarixi ədalətini bərpa etdi. Zəfər Günü yalnız hərbi qələbənin deyil, milli iradənin, dövlətçilik əzminin və Vətən sevgisinin təntənəsidir.
Talıb Talıbov – Zərdab rayonu Alıcanlı kənd sakini
