“Azərbaycan Respublikası Konstitusiyasının 30 illiyi (1995–2025)” Azərbaycan Respublikasının yubiley medalı.
Azərbaycan Respublikasının Konstitusiyası dövlətimizin müstəqilliyinin, suverenliyinin, hüquqi dövlət quruculuğunun və demokratik inkişafının əsasını təşkil edən ali hüquqi sənəddir. 12 noyabr 1995-ci ildə ümumxalq səsverməsi (referendum) yolu ilə qəbul edilmiş Azərbaycan Respublikasının ilk milli Konstitusiyası ölkəmizin dövlətçilik tarixində mühüm hadisə olmuşdur. Bu tarixi sənəd müstəqil Azərbaycanın siyasi, hüquqi və sosial inkişafının əsas istiqamətlərini müəyyən etmiş, insan və vətəndaş hüquq və azadlıqlarının təmin olunması üçün möhkəm hüquqi baza yaratmışdır.
2025-ci ildə Azərbaycan Respublikası Konstitusiyasının qəbul edilməsinin 30 illiyi ölkəmizin ictimai-siyasi həyatında əlamətdar yubiley kimi qeyd olunur. Bu münasibətlə təsis edilmiş “Azərbaycan Respublikası Konstitusiyasının 30 illiyi (1995–2025)” Azərbaycan Respublikasının yubiley medalı Konstitusiyanın dövlətçilik tariximizdəki əhəmiyyətini vurğulamaq, onun prinsiplərinin həyata keçirilməsinə töhfə verən şəxslərin əməyini qiymətləndirmək baxımından xüsusi əhəmiyyət daşıyır.
Yubiley medalının təsis edilməsi Konstitusiyanın 30 illik inkişaf yoluna verilən yüksək dəyərin ifadəsidir. Bu medal Azərbaycan Respublikasının konstitusion quruluşunun möhkəmləndirilməsi, qanunun aliliyinin təmin edilməsi, hüquqi dövlət və vətəndaş cəmiyyəti quruculuğu, insan hüquq və azadlıqlarının qorunması istiqamətində xidmətləri olan şəxslərin fəaliyyətinin qiymətləndirilməsi məqsədinə xidmət edir.
Konstitusiya yalnız hüquqi normalar toplusu deyil, həm də dövlətlə vətəndaş arasında münasibətləri tənzimləyən, cəmiyyətin sabitliyini və inkişafını təmin edən fundamental sənəddir. Onun müddəalarına hörmətlə yanaşmaq, qanunlara əməl etmək, hüquq və vəzifələri dərk etmək hər bir vətəndaşın üzərinə düşən mühüm məsuliyyətdir.
“Azərbaycan Respublikası Konstitusiyasının 30 illiyi (1995–2025)” yubiley medalı, eyni zamanda, dövlətçilik ənənələrimizə sədaqətin, hüquqi dəyərlərə hörmətin və ölkəmizin gələcək inkişafına töhfə vermək əzminin rəmzi kimi dəyərləndirilə bilər.
Bu yubiley medalı Azərbaycan Respublikasının Konstitusiyasının tarixi əhəmiyyətini bir daha ön plana çəkir, müstəqil dövlətçiliyimizin hüquqi əsaslarına ehtiramın ifadəsi kimi xüsusi məna daşıyır. Konstitusiyanın qəbul edilməsinin 30 illiyi münasibətilə təsis olunan bu medal hüquqi dövlət quruculuğu yolunda əldə edilmiş nailiyyətlərin qiymətləndirilməsi və gələcək nəsillərə konstitusion dəyərlərin aşılanması baxımından mühüm əhəmiyyətə malikdir.
Aqil Mehdiyev – Zərdab rayonu Alıcanlı kənd sakini
