Azərbaycan dilinin saflığının qorunması – milli kimliyimizin etibarlı təminatı
Azərbaycan dili xalqımızın milli kimliyini, tarixi yaddaşını, mədəni irsini və dövlətçilik ənənələrini yaşadan ən böyük mənəvi sərvətlərdən biridir. Minilliklər boyu formalaşaraq zənginləşən ana dilimiz bu gün müstəqil Azərbaycanın dövlət dili kimi cəmiyyətimizin bütün sahələrində mühüm rol oynayır. Onun saflığının qorunması, inkişaf etdirilməsi və gələcək nəsillərə olduğu kimi ötürülməsi hər bir Azərbaycan vətəndaşının müqəddəs vəzifəsidir.
Azərbaycan Respublikasının Prezidenti cənab İlham Əliyev Azərbaycan Milli Elmlər Akademiyasının 80 illik yubileyinə həsr olunmuş tədbirdə çıxışı zamanı Azərbaycan dilinin qorunmasının strateji əhəmiyyətini xüsusi vurğulayaraq qeyd etmişdir: “Azərbaycan dilinin saflığının qorunması hər bir Azərbaycan vətəndaşının işi olmalıdır.” Bu fikir ana dilinə münasibətin yalnız dövlət qurumlarının və ya dil mütəxəssislərinin deyil, bütövlükdə cəmiyyətin ortaq məsuliyyəti olduğunu bir daha nümayiş etdirir.
Qloballaşma və informasiya texnologiyalarının sürətli inkişafı müxtəlif dillər arasında qarşılıqlı təsiri artırmaqla yanaşı, milli dillərin qorunmasını da aktual məsələyə çevirmişdir. Xarici söz və ifadələrin zərurət olmadan gündəlik nitqə və mediaya daxil edilməsi Azərbaycan dilinin zəngin ifadə imkanlarından istifadənin məhdudlaşmasına səbəb ola bilər. Prezident İlham Əliyevin də vurğuladığı kimi, televiziya kanallarında, yazılı mediada və ictimai çıxışlarda ana dilinin normalarına ciddi riayət olunması milli-mənəvi dəyərlərimizin qorunmasının vacib şərtlərindəndir.
Dilin saflığının qorunması təkcə lüğət tərkibinin zənginləşdirilməsi və ya yad təsirlərdən uzaq saxlanılması demək deyil. Bu, həm də milli kimliyin, mənəvi dəyərlərin və dövlətçilik şüurunun möhkəmləndirilməsi deməkdir. Çünki dil xalqın tarixi, mədəniyyəti, dünyagörüşü və düşüncə tərzinin daşıyıcısıdır. Ana dilinə hörmət milli dəyərlərə hörmət, dövlətə sədaqət və vətənpərvərlik hissinin mühüm göstəricilərindən biridir.
Bu istiqamətdə alimlərin, dilçilərin, müəllimlərin, yazıçı və şairlərin, jurnalistlərin, dövlət qulluqçularının və digər ziyalıların üzərinə böyük məsuliyyət düşür. Onlar Azərbaycan ədəbi dilinin normalarının qorunmasına, düzgün nitq mədəniyyətinin təbliğinə, gənc nəslin ana dilinə sevgi ruhunda tərbiyə olunmasına öz töhfələrini verməlidirlər. Təhsil müəssisələrində, kütləvi informasiya vasitələrində və rəqəmsal platformalarda Azərbaycan dilinin düzgün tətbiqi bu sahədə aparılan işlərin əsas istiqamətlərindən biri olmalıdır.
Son illər ölkəmizdə dövlət dilinin nüfuzunun daha da artırılması, Azərbaycan əlifbasının tətbiqinin genişləndirilməsi, dil normalarının qorunması və milli-mənəvi dəyərlərin təbliği istiqamətində mühüm tədbirlər həyata keçirilir. Bu siyasət Azərbaycan dilinin müasir dövrün tələblərinə uyğun inkişafına, eyni zamanda onun milli xüsusiyyətlərinin və saflığının qorunmasına xidmət edir.
Prezident İlham Əliyevin Azərbaycan dilinin qorunması ilə bağlı çağırışları hər bir vətəndaş üçün mühüm məsuliyyət və vəzifə müəyyən edir. Ana dilimizin zənginliyini qorumaq, onu gündəlik həyatımızda düzgün və səlis şəkildə işlətmək, gələcək nəsillərə saf formada çatdırmaq hər birimizin vətəndaşlıq borcudur. Çünki Azərbaycan dilinin yaşaması və inkişafı milli kimliyimizin, dövlət müstəqilliyimizin və mənəvi dəyərlərimizin əbədi yaşamasının ən mühüm təminatlarından biridir.
Fərid Qurbanov – Zərdab rayonu, Təzəkənd kənd sakini, fəal gənc
