1 Avqust – Azərbaycan əlifbası və Azərbaycan dili günü
Azərbaycan dili xalqımızın milli kimliyini, tarixi yaddaşını, mədəni irsini və mənəvi dəyərlərini özündə yaşadan ən böyük sərvətlərimizdən biridir. Hər bir xalqın varlığını və milli-mənəvi bütövlüyünü qoruyan əsas amillərdən biri onun ana dilidir. Azərbaycan xalqı da əsrlər boyu zəngin və ahəngdar dilini qoruyaraq gələcək nəsillərə ötürmüş, onu daim inkişaf etdirmişdir.
Ümummilli Lider Heydər Əliyev Azərbaycan dilinin qorunması və inkişaf etdirilməsini dövlət siyasətinin prioritet istiqamətlərindən biri kimi müəyyənləşdirmişdir. Ulu Öndərin “Müxtəlif dillərə mənsub olan insanlar Azərbaycan dilini sadəcə eşidərək, onun mənasını o qədər bilməyərək, Azərbaycan dilinin nə qədər şeirə bənzədiyini, xoş ahəngli olduğunu dəfələrlə qeyd ediblər. Biz dilimizlə fəxr etməliyik. Dil hər bir millətin milliliyinin əsasıdır…” fikirləri Azərbaycan dilinə verilən yüksək dəyərin və göstərilən xüsusi qayğının parlaq ifadəsidir. Bu dəyər hər bir vətəndaş üçün örnək olmaqla yanaşı, ana dilimizin qorunması və zənginləşdirilməsi istiqamətində mühüm çağırışdır.
1 avqust tarixinin Azərbaycan əlifbası və Azərbaycan dili günü kimi qeyd olunması da məhz milli-mənəvi dəyərlərimizin yaşadılması və gələcək nəsillərə ötürülməsi baxımından xüsusi əhəmiyyət daşıyır. Azərbaycan Respublikasının Prezidenti tərəfindən bu əlamətdar günün təsis edilməsi ana dilimizin dövlətçilik tariximizdə tutduğu müstəsna yeri bir daha təsdiq etmişdir. Azərbaycan əlifbası və dili müstəqilliyimizin, milli birliyimizin və dövlətçiliyimizin ayrılmaz rəmzlərindəndir.
Azərbaycan dili zəngin lüğət tərkibi, poetik ifadə imkanları, ahəngdarlığı və özünəməxsus gözəlliyi ilə dünya dilləri arasında seçilir. Ədəbiyyatımızın görkəmli nümayəndələrinin yaratdığı ölməz əsərlər, elmi və publisistik irsimiz ana dilimizin nə qədər geniş ifadə imkanlarına malik olduğunu nümayiş etdirir. Dövlət dilinin saflığının qorunması, düzgün tətbiqi və inkişaf etdirilməsi isə hər bir vətəndaşın mənəvi borcudur.
Müasir dövrdə qloballaşma proseslərinin sürətləndiyi, informasiya texnologiyalarının geniş yayıldığı bir şəraitdə Azərbaycan dilinin zənginliyinin qorunması, onun düzgün işlədilməsi və gələcək nəsillərə saf şəkildə ötürülməsi daha böyük əhəmiyyət kəsb edir. Xüsusilə gənclərin ana dilini dərindən mənimsəməsi, onun qrammatik normalarını və incəliklərini bilməsi milli kimliyimizin möhkəmləndirilməsinə xidmət edir. Ulu Öndər Heydər Əliyevin qeyd etdiyi kimi, müstəqil Azərbaycanda Azərbaycan dili təkcə dövlət dili deyil, həm də cəmiyyətimizin bütün sahələrində hakim mövqedə olmalıdır.
Bu gün Azərbaycan Respublikasının Prezidenti cənab İlham Əliyev tərəfindən də Azərbaycan dilinin qorunması, inkişaf etdirilməsi və dövlət dili kimi nüfuzunun daha da artırılması istiqamətində ardıcıl siyasət həyata keçirilir. Dövlət dilinin tətbiqinin genişləndirilməsi, latın qrafikalı Azərbaycan əlifbasının istifadəsinin möhkəmləndirilməsi, ana dilində nəşrlərin və elektron resursların artırılması bu siyasətin mühüm istiqamətlərindəndir.
1 Avqust – Azərbaycan əlifbası və Azərbaycan dili günü hər bir vətəndaşı ana dilinə sevgi və ehtiram göstərməyə, onun saflığını qorumağa və zənginləşdirməyə səsləyən əlamətdar gündür. Azərbaycan dilini qorumaq, inkişaf etdirmək və gələcək nəsillərə olduğu kimi çatdırmaq hər birimizin müqəddəs vətəndaşlıq borcudur. Ana dilimizə hörmət milli kimliyimizə, dövlətçiliyimizə və tariximizə hörmətin ən ali təzahürüdür.
Nailə Əliyeva Zərdab rayon Mərkəzləşdirilmiş Kitabxana Sisteminin direktoru
