Hollandiya hökumətinin başçısı Mark Rutte NATO-nun baş katibi postuna əsas namizəddir
57 yaşlı Mark Rutte NATO-nun baş katibi postuna Yens Stoltenberqi əvəz etməyə əsas namizəddir. O, hazırda Hollandiyanın baş naziri vəzifəsini icra edir.
Fransanın baş naziri Qabriel Attal martın 6-da Hollandiyaya səfəri zamanı bildirib ki, Paris Hollandiya hökumətinin başçısı Mark Ruttenin NATO-nun növbəti baş katibi seçilməsini dəstəkləyir.
Rutte özü ABŞ-da keçirilən prezident seçkilərinin nəticələrindən asılı olmayaraq, dövlətlərin alyansın etibarlı tərəfdaşları və üzvləri olaraq qalacağına əminliyini bildirib.
NATO-ya on il rəhbərlik etmiş Stoltenberqin varisinin alyansın iyulda Vaşinqtonda keçiriləcək sammitindən əvvəl açıqlanacağı gözlənilir.
ABŞ, Böyük Britaniya və Almaniya Rutteni dəstəklədiklərini açıq şəkildə bəyan etmişdilər. Amma yekun qərar NATO-ya üzv olan bütün ölkələrin razılığı ilə verilməlidir.