Azərbaycan dövlətlərarası münaqişələrin həlli məsələsində ikili standartların və seçici yanaşmaların tətbiqi ilə bağlı zərərli praktikaya qarşı fəal və əsaslandırılmış şəkildə çıxış edir
Müasir dünyada beynəlxalq münasibətlər sisteminin qarşısında duran əsas vəzifələrdən biri dövlətlər arasında etimadın gücləndirilməsi, münaqişələrin qarşısının alınması və mövcud problemlərin beynəlxalq hüququn norma və prinsipləri əsasında həll edilməsidir. Müxtəlif regionlarda baş verən siyasi proseslər, təhlükəsizlik çağırışları və geosiyasi rəqabət beynəlxalq əməkdaşlığın əhəmiyyətini daha da artırır. Belə bir şəraitdə dövlətlərin suverenliyinə, ərazi bütövlüyünə və müstəqilliyinə hörmət edilməsi, eləcə də beynəlxalq hüququn bütün ölkələrə münasibətdə eyni meyarlarla tətbiqi xüsusi aktuallıq kəsb edir. Azərbaycan Respublikası beynəlxalq münasibətlərdə ədalət, qarşılıqlı hörmət və hüquqi bərabərlik prinsiplərinin qorunmasını xarici siyasətinin mühüm istiqamətlərindən biri kimi müəyyənləşdirib. Ölkəmiz dövlətlərarası münaqişələrin həlli prosesində ikili standartların və seçici yanaşmaların tətbiqinə qarşı ardıcıl mövqe nümayiş etdirir. Azərbaycanın yanaşmasına görə, beynəlxalq hüququn prinsipləri siyasi maraqlardan asılı olmayaraq bütün dövlətlərə eyni şəkildə şamil olunmalı, qəbul edilən qərarların icrası təmin edilməli və münaqişələrin həllində ədalət meyarı əsas götürülməlidir.
Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin 7-ci Zirvə Görüşü də bu məsələlərin müzakirəsi, dövlətlər arasında siyasi dialoqun genişləndirilməsi və çoxtərəfli əməkdaşlığın möhkəmləndirilməsi baxımından əhəmiyyətli beynəlxalq tədbir kimi diqqət çəkib. Azərbaycanın ev sahibliyi etdiyi zirvə görüşü ölkəmizin beynəlxalq platformalarda fəal iştirakını, regional və qlobal məsələlərin həllinə töhfə vermək niyyətini nümayiş etdirib. Beynəlxalq hüququn əsas prinsipləri dövlətlərin dinc yanaşı yaşamasının, qarşılıqlı münasibətlərinin tənzimlənməsinin və təhlükəsizliyin qorunmasının hüquqi əsasını təşkil edir. Birləşmiş Millətlər Təşkilatının Nizamnaməsində təsbit olunmuş suveren bərabərlik, ərazi bütövlüyünə hörmət, güc tətbiqindən çəkinmək və mübahisələrin dinc vasitələrlə həlli prinsipləri beynəlxalq münasibətlərin sabitliyi üçün mühüm əhəmiyyət daşıyır. Azərbaycan beynəlxalq münasibətlərdə bu cür yanaşmaların yolverilməz olduğunu vurğulayır. Ölkəmizin mövqeyinə görə, beynəlxalq təşkilatların qərarları və qətnamələri konkret siyasi şəraitdən və maraqlardan asılı olmayaraq obyektiv şəkildə qiymətləndirilməli, onların icrası üçün zəruri addımlar atılmalıdır. Beynəlxalq hüququn nüfuzu onun müddəalarının yalnız bəyan edilməsindən deyil, real həyatda tətbiqindən və öhdəliklərin yerinə yetirilməsindən asılıdır. Azərbaycanın bu mövqeyi ölkəmizin üzləşdiyi tarixi hadisələrlə də sıx bağlıdır. Ermənistanın Azərbaycanın beynəlxalq səviyyədə tanınmış ərazilərini uzun müddət işğal altında saxlaması və BMT Təhlükəsizlik Şurasının 1993-cü ildə qəbul etdiyi dörd qətnamənin illərlə icra olunmaması beynəlxalq hüququn tətbiqi məsələsində ciddi problemlərin mövcudluğunu göstərib. Həmin qətnamələrdə Azərbaycanın ərazi bütövlüyü ilə bağlı məsələlər və işğal olunmuş ərazilərdən qüvvələrin çıxarılması tələbləri öz əksini tapmışdı. Bu təcrübə beynəlxalq hüququn prinsiplərinin ardıcıl tətbiqinin nə qədər vacib olduğunu göstərir. Azərbaycanın mövqeyinə əsasən, hər hansı münaqişəyə münasibətdə siyasi maraqlar hüquqi öhdəliklərin yerinə yetirilməsini arxa plana keçirməməlidir. Dövlətlərin ərazi bütövlüyü və suverenliyi universal prinsiplərdir və bu prinsiplərə münasibətdə seçici yanaşma beynəlxalq münasibətlər sisteminin etibarlılığına mənfi təsir göstərir.
Əlihüseyn Rəsullu- Hüseynxanlı kənd sakini, fəal gənc
