Azərbaycan və Gürcüstan arasında əməkdaşlıq xüsusilə enerji və nəqliyyat-logistika sahələrində özünü daha aydın şəkildə göstərir. Bu istiqamətdə həyata keçirilən iri layihələr yalnız iki ölkənin deyil, bütövlükdə regionun və hətta qlobal iqtisadiyyatın inkişafına mühüm töhfə verir.
Xəzər hövzəsinin zəngin enerji ehtiyatlarının dünya bazarlarına çıxarılmasında Gürcüstanın tranzit ölkə kimi rolu əvəzsizdir. Bu əməkdaşlığın ən bariz nümunələri Bakı–Tbilisi–Ceyhan neft kəməri və Cənub Qaz Dəhlizi kimi qlobal əhəmiyyətli layihələrdir. Həmin layihələr Avropanın enerji təhlükəsizliyinin təmin olunmasına xidmət edir və alternativ enerji marşrutlarının formalaşmasında mühüm rol oynayır.
Eyni zamanda, nəqliyyat sahəsində həyata keçirilən Bakı–Tbilisi–Qars dəmiryolu xətti Şərq ilə Qərb arasında mühüm bağlantı yaradır. Bu layihə beynəlxalq yükdaşımaların həcmini artırmaqla yanaşı, regionun tranzit potensialını da əhəmiyyətli dərəcədə gücləndirir. Nəticədə Azərbaycan və Gürcüstan beynəlxalq nəqliyyat şəbəkəsində strateji mövqeyə malik ölkələrə çevrilmişdir.
Orta Dəhliz layihəsi çərçivəsində görülən işlər isə Avrasiya məkanında yeni iqtisadi və logistika imkanları açır. Bu təşəbbüs Asiya ilə Avropa arasında daha qısa və səmərəli nəqliyyat marşrutlarının formalaşmasına şərait yaradır və regionun qlobal ticarətdə rolunu artırır.
Azərbaycan və Gürcüstan regional sabitliyin təmin olunmasında da mühüm rol oynayır. Cənubi Qafqazda formalaşan yeni geosiyasi reallıqlar fonunda əməkdaşlığın genişlənməsi sülh və təhlükəsizlik üçün mühüm əhəmiyyət kəsb edir. Xüsusilə iqtisadi əməkdaşlıq və ticarət əlaqələrinin genişləndirilməsi regionda davamlı sabitliyin möhkəmləndirilməsinə xidmət edir.
Prezident İlham Əliyevin Gürcüstana səfəri zamanı səsləndirdiyi fikirlər göstərir ki, Azərbaycan–Gürcüstan əməkdaşlığı yalnız mövcud layihələrlə məhdudlaşmır, eyni zamanda yeni təşəbbüslər və perspektiv planlarla zəngindir. Enerji və nəqliyyat sahələrində həyata keçirilən birgə layihələr Azərbaycan və Gürcüstan arasında strateji tərəfdaşlığın əsas dayaqlarını təşkil edir. Bu əməkdaşlıq modeli regionun inkişafına, qlobal enerji təhlükəsizliyinə və beynəlxalq nəqliyyat əlaqələrinin gücləndirilməsinə mühüm töhfə verməkdə davam edir.
Həsən Abulov – Zərdab Rayon Ağsaqqallar Şurasının sədr müavini
