20 oktyabr 2020-ci il – Zəngilan rayonu işğaldan azad edilmişdir
2020-ci il Azərbaycan tarixində milli iradənin, hərbi qüdrətin və tarixi ədalətin təntənəsi kimi əbədi yaşayacaq. Sentyabrın 27-də başlayan Vətən müharibəsi xalqımızın uzun illər ərzində qəlbində yaşatdığı doğma torpaqlara qayıtmaq arzusunu gerçəkləşdirdi. Bu böyük Zəfərin mühüm səhifələrindən biri də oktyabrın 20-də Zəngilan şəhərinin və rayonun bir sıra kəndlərinin işğaldan azad edilməsi oldu.
Cəbrayıl istiqamətində əldə olunan uğurlar Azərbaycan Ordusunun Zəngilan rayonunun inzibati ərazisinə doğru irəliləməsinə şərait yaratdı. Oktyabrın 18-də başlanan azadlıq əməliyyatları qısa müddətdə mühüm nəticələr verdi. Oktyabrın 20-də Prezident, Müzəffər Ali Baş Komandan İlham Əliyev xalqa müraciətində Zəngilan şəhərinin, Havalı, Zərnəli, Məmmədbəyli, Həkəri, Şərifan və Birinci Muğanlı kəndlərinin azad edildiyini elan etdi. Bu xəbər illərlə yurd həsrəti çəkən minlərlə insanın qəlbində böyük sevinc və qürur yaratdı.
Zəngilanın azad edilməsi Azərbaycan Ordusunun döyüş qabiliyyətinin, peşəkarlığının və mürəkkəb hərbi şəraitdə düzgün qərarlar qəbul etmək bacarığının göstəricisi idi. Döyüşlər nəticəsində rayonun mərkəzi, dörd qəsəbəsi və 49 kəndi işğaldan azad olundu. Beləliklə, Zəngilanın azadlığı Azərbaycanın ərazi bütövlüyünün bərpası istiqamətində mühüm hərbi və strateji nəticələrdən birinə çevrildi.
Bu Qələbənin arxasında Azərbaycan əsgərinin fədakarlığı, şəhidlərimizin qanı, qazilərimizin qəhrəmanlığı və xalqımızın sarsılmaz birliyi dayanırdı. Cəbhədə vuruşan hər bir hərbçinin iradəsi, arxa cəbhədə əsgərinə mənəvi dəstək olan insanların həmrəyliyi ümumi Zəfərin ayrılmaz hissəsi idi.
Zəngilanın azadlığı yalnız hərbi uğur kimi qiymətləndirilə bilməz. Bu hadisə doğma torpaqlarından didərgin düşmüş insanların qayıdış ümidini gücləndirdi, Azərbaycanın suverenliyinin və ərazi bütövlüyünün bərpasına aparan yolu daha da genişləndirdi.
Bu gün Zəngilan şəhərində aparılan bərpa və quruculuq işləri həmin Qələbənin davamıdır. Azad edilmiş torpaqlarda yaradılan yeni infrastruktur, yaşayış məntəqələrinin yenidən qurulması və insanların doğma yurda qayıdışı müharibədə qazanılmış uğurların dinc həyatla möhkəmləndirildiyini göstərir.
20 Oktyabr – Zəngilan şəhəri günü xalqımızın yaddaşında qəhrəmanlıq, qürur və qayıdışın rəmzi kimi yaşayır. Bu tarix Azərbaycan dövlətinin qətiyyətini, Ordumuzun gücünü və xalqımızın Vətənə sonsuz bağlılığını təcəssüm etdirir.
Raqib Əsədov – Zərdab rayonu Alıcanlı kənd sakini
