Rusiya prezidenti Vladimir Putin Ukraynadakı döyüşlərin gedişi ilə bağlı keçirilən videomüşavirədə Baş Qərargah rəisi Valeri Gerasimovun məruzəsini dinləyib. Kremlin sözçüsü Dmitri Peskovun açıqlamasına görə, müşavirədə əsas diqqət Donbas istiqamətindəki vəziyyətə yönəlib.
Musavat.com xəbər verir ki, Kremlin yaydığı məlumata əsasən, hücum bölmələrinin komandirləri videobağlantı vasitəsilə Konstantinovkadan Prezident Putinə şəhərdəki vəziyyət barədə məlumat verib, pilotsuz uçuş aparatları ilə çəkilmiş görüntüləri təqdim ediblər.
Putin çıxışında bildirib ki, Konstantinovka tamamilə Rusiya qüvvələrinin nəzarətinə keçib və bunu “Rusiya hərbçilərinin qəhrəmanlığı” ilə əlaqələndirib. O, əməliyyatda iştirak edən hərbçilərə təşəkkür edib.
Kremlin məlumatına görə, Putin həmçinin bildirib ki:
– strateji təşəbbüs cəbhənin bütün istiqamətlərində Rusiya ordusunun əlindədir;
– Luqansk vilayətinin tam nəzarətə götürüldüyünü qeyd edib;
– Donetsk vilayətində Rusiya qoşunlarının irəlilədiyini vurğulayıb;
– Xarkov, Sumı və Dnepropetrovsk vilayətləri ilə sərhəd ərazilərində “təhlükəsizlik zolağı” yaradıldığını deyib;
– yay dövrü üçün daha fəal hücum əməliyyatlarının vəzifələrini hərbçilərlə müzakirə edib.
Rusiya Silahlı Qüvvələri Baş Qərargah rəisinin birinci müavini Sergey Rudskoy isə keçirdiyi brifinqdə Konstantinovkanı Donbasda Ukraynanın son əsas müdafiə xətti sayılan Kramatorsk-Slavyansk aqlomerasiyasına aparan əsas şəhər kimi qiymətləndirib.
Onun sözlərinə görə, şəhər 2014-cü ildən etibarən mərhələli şəkildə möhkəmləndirilmiş, iki müdafiə xətti, 150 kilometrdən çox səngər və tank əleyhinə xəndəklərlə qorunmuşdu. Rudskoy iddia edib ki, Ukrayna şəhərin müdafiəsi üçün 45 batalyondan ibarət, təxminən 15,5 min nəfərlik qruplaşma yaratmışdı.
Rusiya tərəfi həmçinin bildirib ki, Konstantinovka uğrunda döyüşlər zamanı Ukrayna ordusu 13,5 minə yaxın hərbçi, 14 tank və 200 artilleriya sistemi itirib. Bu məlumatlar müstəqil mənbələr tərəfindən təsdiqlənməyib.
Zelenski: “Bu, sadəcə, növbəti rus yalanıdır”
Ukrayna Prezidenti Volodimir Zelenski isə Rusiya tərəfinin Konstantinovkanın ələ keçirilməsi ilə bağlı bəyanatını qəti şəkildə təkzib edib.
Zelenski bildirib:
“ABŞ-ın Müstəqillik Günü ərəfəsində Putin dünyaya və ABŞ prezidentinə cəbhədəki vəziyyətlə bağlı yalan danışmaq qərarına gəlib. O iddia edir ki, ruslar Konstantinovkanı guya ələ keçiriblər. Əlbəttə ki, bu, doğru deyil. Bu, sadəcə, xəbərə başlamaq üçün başqa bir rus yalanıdır. Əgər Konstantinovka indi Rusiyanın nəzarəti altındadırsa, onda Putin yəqin ki, orada mənimlə görüşməkdə və müharibəyə son qoymaq üçün diplomatik həllər tapmaqda problem yaşamayacaq. Amma o, buraya gələ bilməyəcək, çünki reallıq Putinin dediklərindən çox fərqlidir.”
Beləliklə, tərəflər Konstantinovkadakı vəziyyətlə bağlı bir-birinə zidd açıqlamalar verirlər. Hazırda şəhərin tam şəkildə hansı tərəfin nəzarətində olması barədə müstəqil və beynəlxalq mənbələr tərəfindən təsdiqlənmiş yekun məlumat mövcud deyil.
