Prezident İlham Əliyevin beynəlxalq humanitar missiyası və sülhə çağırışının qlobal əhəmiyyəti
Müasir dünyada dövlətlərin beynəlxalq nüfuzu təkcə iqtisadi və hərbi potensialla deyil, eyni zamanda humanitar təşəbbüslərə, sülhə və insan dəyərlərinə verdiyi töhfə ilə ölçülür. Bu baxımdan Azərbaycan Respublikasının Prezidenti cənab İlham Əliyevin nüfuzlu “Zayed İnsan Qardaşlığı Mükafatı”na layiq görülməsi ölkəmizin qlobal humanitar gündəlikdə tutduğu mövqenin növbəti təsdiqi kimi qiymətləndirilir.
Birləşmiş Ərəb Əmirliklərinin banisi, mərhum Şeyx Zayed bin Sultan Al Nahyanın adını daşıyan bu mükafat dünyada tolerantlıq, qarşılıqlı anlaşma, mərhəmət və birgəyaşayış prinsiplərinin təşviqinə xidmət edən ali beynəlxalq platformadır. Prezident İlham Əliyevin bu mükafatla təltif olunması Azərbaycanın son illərdə həyata keçirdiyi humanitar yönümlü siyasətin və multikultural dəyərlərə əsaslanan dövlət idarəçiliyinin beynəlxalq səviyyədə yüksək etimad qazandığını göstərir.
Mükafatın təqdimetmə mərasimində çıxış edən dövlətimizin başçısı bu ali təltifi böyük şərəf kimi qəbul etdiyini bildirərək, münsiflər heyətinə və tədbir iştirakçılarına minnətdarlığını ifadə etmişdir. Prezident İlham Əliyev, həmçinin regionda sülhün bərqərar olunması istiqamətində göstərilən beynəlxalq səyləri yüksək qiymətləndirmiş, xüsusilə Vaşinqtonda keçirilmiş üçtərəfli görüşün nəticələrinə toxunmuşdur. Onun sözlərinə görə, həmin Zirvə Görüşü çərçivəsində Azərbaycan və Ermənistan arasında sülh sazişinin paraflanması və Birgə Bəyannamənin imzalanması regionda yeni siyasi reallıqların formalaşmasına yol açmışdır.
Bu sənədlər beynəlxalq hüququn fundamental prinsiplərinə əsaslanan münasibətlərin qurulması, qarşılıqlı etimadın gücləndirilməsi və uzunmüddətli sabitliyin təmin edilməsi baxımından mühüm əhəmiyyət daşıyır. Üç onillikdən artıq müddətdə davam etmiş münaqişənin yaratdığı ağır humanitar fəsadların aradan qaldırılması istiqamətində atılan bu addımlar Cənubi Qafqazda sülh və təhlükəsizlik üçün real perspektivlər formalaşdırır.
Prezident İlham Əliyev çıxışında uzunmüddətli münaqişələrin cəmiyyətlərdə dərin sosial və psixoloji izlər buraxdığını, insan həyatına və regional inkişaf proseslərinə ciddi zərər vurduğunu xüsusi vurğulamışdır. Bununla belə, dövlətimizin başçısı qeyd etmişdir ki, güclü siyasi iradə, praqmatik yanaşma və gələcəyə yönəlmiş baxış mövcud olduqda ən mürəkkəb münaqişələrin belə sülh yolu ilə həlli mümkündür. Dialoqun təşviqi, qarşılıqlı etimadın bərpası və kompromislərə hazır olmaq dayanıqlı sülhün əsas şərtləri kimi dəyərləndirilmişdir.
Bu baxımdan Azərbaycan ilə Ermənistan arasında formalaşmaqda olan sülh modeli beynəlxalq ictimaiyyət üçün də mühüm nümunə hesab olunur. Prezident İlham Əliyevin vurğuladığı kimi, bu təcrübə hələ də münaqişə şəraitində yaşayan ölkələr üçün real yol xəritəsi rolunu oynaya bilər.
Prezident İlham Əliyevin “Zayed İnsan Qardaşlığı Mükafatı”na layiq görülməsi təkcə fərdi liderlik nümunəsinin deyil, bütövlükdə Azərbaycanın sülhə, humanizmə və qlobal həmrəyliyə verdiyi töhfənin beynəlxalq miqyasda tanınmasının ifadəsidir. Bu hadisə bir daha göstərir ki, Azərbaycan müasir beynəlxalq münasibətlər sistemində etibarlı tərəfdaş və ümumbəşəri dəyərlərin fəal daşıyıcısı kimi çıxış edir.
Fazil Kərimov – Zərdab rayonu, İsaqbağı kənd sakini, təqaüddə olan müəllim
