Macarıstanın baş naziri Viktor Orban bəyan edib ki, Avropada sülh yolunu ardıcıl şəkildə müdafiə edən yeganə ölkə Macarıstandır.
Xeberaz.info xəbər verir ki, o, bu fikrini ABŞ və Rusiya prezidentlərinin yaxın vaxtlarda Budapeştdə keçiriləcək görüşü ilə əlaqələndirib.
Orbanın sözlərinə görə, Macarıstan heç vaxt danışıqları bağlamayıb və digər dövlətlərə “dərs keçməyə” çalışmayıb. “Əgər kiminləsə danışmırsansa, onu inandırmaq da çətindir. Biz ardıcıl və prinsipial şəkildə sülhün tərəfindəyik. Qarşıdurma əvəzinə əməkdaşlıq, ittiham əvəzinə qarşılıqlı hörmət — məhz bu, sülhə aparan yoldur,” – deyə o bildirib.
Baş nazir vurğulayıb ki, hazırda Avropada ABŞ və Rusiya arasında mümkün sülh razılaşmasına real şərait yarada biləcək yeganə ölkə məhz Macarıstandır. “Brüssel özünü təcrid edib, amma biz dialoqu davam etdiririk,” – Orban əlavə edib.
Budapeştin ABŞ və Rusiya prezidentlərinin növbəti görüşünə ev sahibliyi etməsi gözlənilir. Viktor Orbanın sözlərinə görə, bu təşəbbüs ölkəsinin neytral mövqeyindən və beynəlxalq vasitəçilik təcrübəsindən irəli gəlir. Ekspertlər hesab edirlər ki, Orbanın bəyanatı Avropa İttifaqı daxilindəki fikir ayrılıqlarının dərinləşdiyi, xüsusilə Ukrayna münaqişəsinə yanaşmada fərqli mövqelərin ortaya çıxdığı bir dövrdə səslənməsi ilə diqqət çəkir.
