“Dəmir yumruq” əməliyyatı
2020-ci ilin 27 sentyabr səhəri Azərbaycan tarixinə qızıl hərflərlə yazıldı. Həmin gün Azərbaycan Ordusu Ermənistanın uzun illər davam edən işğalına, təxribatlarına və hücumlarına cavab olaraq “Dəmir yumruq” əməliyyatına başladı. Bu əməliyyat təkcə hərbi deyil, həm də mənəvi və milli birlik rəmzi kimi tarixdə qalacaq bir qəhrəmanlıq dastanına çevrildi.
Əməliyyatın ilk saatlarından cəbhə xəttindən sevindirici xəbərlər gəlməyə başladı. Azərbaycan Ordusu böyük ruh yüksəkliyi ilə döyüşə atıldı, hər gün yeni kəndlər, şəhərlər və yüksəkliklər azad edilirdi. Cəbrayıl, Füzuli, Zəngilan, Qubadlı, Hadrut və digər bölgələrdə igid əsgərlərimiz işğal altında olan torpaqları bir-bir geri alırdılar. Hər qələbə xəbəri xalqın qəlbində böyük qürur hissi oyadırdı.
Bu müharibədə Azərbaycan Ordusunun hər bir əsgəri və zabiti bir amal uğrunda vuruşurdu — torpaqlarımızı azad etmək, 30 ilə yaxın davam edən işğala son qoymaq və tarixi ədaləti bərpa etmək. Bu amalın gücü sayəsində ordumuz 44 gün ərzində düşmənin illərlə qurduğu müdafiə xətlərini yararaq, onu məğlub etdi.
Müharibənin gedişində Prezident, Ali Baş Komandan İlham Əliyevin qətiyyətli rəhbərliyi, xalqın ordusuna olan dərin inamı və birliyi “dəmir yumruq” kimi birləşdi. Bu “dəmir yumruq” düşmənin ordusunu və təxribat planlarını darmadağın etdi.
Əməliyyatın ən şanlı səhifəsi isə 8 noyabr 2020-ci ildə Şuşa şəhərinin azad olunması oldu. Şuşa Azərbaycanın mədəniyyət beşiyi, milli qürurumuzun simvolu idi. Onun azadlığı bütün xalq üçün qələbənin rəmzinə çevrildi. Elə bu səbəbdən 8 noyabr günü ölkəmizdə Zəfər Günü kimi qeyd olunur.
44 günlük Vətən müharibəsi nəticəsində Azərbaycan öz ərazi bütövlüyünü bərpa etdi. Düşmən kapitulyasiya aktına imza atmağa məcbur oldu. Beləcə, xalqımızın uzun illər gözlədiyi Böyük Qələbə reallaşdı.
Bu qələbə Azərbaycan xalqının birliyinin, şəhidlərimizin qanı, qazilərimizin fədakarlığı və ordumuzun qəhrəmanlığının nəticəsidir. “Dəmir yumruq” əməliyyatı bir daha sübut etdi ki, Azərbaycan xalqı heç vaxt işğalla barışmır və öz torpaqlarını azad etmək əzmini heç zaman itirmir.
Bu gün biz qalib xalqıq! Bu qalibiyyət bizə həm tariximizə, həm də gələcəyimizə daha böyük inam və qürur bəxş edib. “Dəmir yumruq” əməliyyatı Azərbaycan xalqının iradəsinin, birliyinin və qəhrəmanlığının əbədi rəmzidir.
Zərdab rayon Mədəniyyət Mərkəzinin direktoru Elyurə Məmmədova
