Azərbaycanın tolerantlıq və sülh modeli beynəlxalq miqyasda yüksək qiymətləndirildi
Müasir beynəlxalq münasibətlər sistemində sülhün, qarşılıqlı hörmətin və humanist dəyərlərin təşviqi xüsusi əhəmiyyət kəsb edir. Bu baxımdan Azərbaycan Respublikasının Prezidenti cənab İlham Əliyevin Birləşmiş Ərəb Əmirliklərinə rəsmi səfəri və “Zayed İnsan Qardaşlığı Mükafatı”na layiq görülməsi ölkəmizin beynəlxalq nüfuzunun növbəti təsdiqi kimi qiymətləndirilir.
Bu mükafat mərhum Şeyx Zayed bin Sultan Al Nəhyanın humanist ideallarına əsaslanaraq dünyada sülhü, dinlərarası və mədəniyyətlərarası dialoqu təşviq edən nüfuzlu beynəlxalq təşəbbüsdür. Prezident İlham Əliyevin bu ali mükafatla təltif olunması Azərbaycan dövlətinin həyata keçirdiyi balanslaşdırılmış və dəyərlərə söykənən siyasətin beynəlxalq səviyyədə qəbul edildiyini göstərir.
Azərbaycan multikulturalizm ənənələrinə sadiq olan nadir ölkələrdəndir. Ölkəmizdə müxtəlif dini və etnik icmaların nümayəndələri uzun illərdir qarşılıqlı hörmət və etimad şəraitində yaşayır. Prezident İlham Əliyevin rəhbərliyi ilə bu model yalnız daxili sabitliyin təmin olunmasına deyil, həm də beynəlxalq aləmdə nümunəvi təcrübə kimi təqdim edilməsinə xidmət edir.
Əbu-Dabidə keçirilən mükafatlandırma mərasimi zamanı səsləndirilən fikirlər Azərbaycanın sülh və insan qardaşlığı ideyalarına verdiyi əhəmiyyəti bir daha nümayiş etdirdi. Bu yanaşma təkcə qlobal müstəvidə deyil, regionda da öz real nəticələrini verməkdədir. Azərbaycan Cənubi Qafqazda davamlı sülhün və təhlükəsizliyin təmin olunması istiqamətində ardıcıl və prinsipial mövqe nümayiş etdirir.
Bununla yanaşı, Azərbaycan ilə Birləşmiş Ərəb Əmirlikləri arasında münasibətlər strateji tərəfdaşlıq səviyyəsinə yüksəlmişdir. İqlim dəyişmələri ilə mübarizə, enerji təhlükəsizliyi və dayanıqlı inkişaf sahələrində əməkdaşlıq iki ölkənin qlobal çağırışlara birgə və məsuliyyətli yanaşmasının göstəricisidir.
Prezident İlham Əliyevin “Zayed İnsan Qardaşlığı Mükafatı”na layiq görülməsi Azərbaycanın beynəlxalq sülhə, tolerantlığa və humanizmə verdiyi töhfələrin yüksək qiymətləndirilməsidir. Bu hadisə Azərbaycan dövlətinin qlobal miqyasda etibarlı tərəfdaş və ümumbəşəri dəyərlərin daşıyıcısı kimi mövqeyini bir daha möhkəmləndirir.
Cavid Nuriyev – Zərdab şəhər sakini, fəal gənc
