Azərbaycan energetika sahəsində uzun illər bir çox ölkələrin enerji təhlükəsizliyini gücləndirən addımlar atmışdır.
2026-cı il aprelin 6-da Azərbaycan Respublikasının Prezidenti cənab İlham Əliyev Gürcüstana rəsmi səfəri zamanı mətbuata verdiyi bəyanatında mühüm məqamlardan biri kimi vurğuladı ki, “Azərbaycan energetika sahəsində uzun illər bir çox ölkələrin enerji təhlükəsizliyini gücləndirən addımlar atmışdır.” Bu fikir Azərbaycanın son onilliklər ərzində formalaşdırdığı enerji strategiyasının uğurlu nəticələrinin məntiqi ifadəsidir. Müstəqillik illərindən etibarən Azərbaycan zəngin təbii ehtiyatlarını düzgün idarə edərək enerji sektorunu milli inkişafın əsas sütununa çevirib. Neft və qaz layihələrinin ardıcıl şəkildə həyata keçirilməsi ölkənin beynəlxalq enerji bazarında etibarlı tərəfdaş kimi tanınmasına səbəb olub. Bu etimad isə təkcə iqtisadi fayda ilə məhdudlaşmayaraq, siyasi və strateji əməkdaşlığın da əsasını təşkil edir.
Xüsusilə Gürcüstan ilə qurulan sıx enerji tərəfdaşlığı regionun enerji xəritəsini köklü şəkildə dəyişib. Azərbaycan qazının Gürcüstan üzərindən dünya bazarlarına çıxarılması həm tranzit ölkənin iqtisadi rolunu artırıb, həm də enerji marşrutlarının şaxələndirilməsinə mühüm töhfə verib. Bu əməkdaşlıq modeli qarşılıqlı fayda prinsiplərinə əsaslanaraq uzunmüddətli sabitliyin təminatına çevrilib. Azərbaycanın təşəbbüsü və iştirakı ilə həyata keçirilən beynəlxalq enerji layihələri Avropanın enerji təhlükəsizliyində də xüsusi yer tutur. Alternativ mənbələrin şaxələndirilməsi fonunda Azərbaycan qazı bir çox ölkələr üçün etibarlı və davamlı enerji mənbəyinə çevrilib. Bu isə qlobal enerji bazarında baş verən dəyişikliklər fonunda Azərbaycanın strateji əhəmiyyətini daha da artırır.
Energetika sahəsində əldə edilən uğurlar yalnız resursların ixracı ilə məhdudlaşmır. Azərbaycan eyni zamanda enerji infrastrukturunun modernləşdirilməsi, yeni texnologiyaların tətbiqi və bərpa olunan enerji mənbələrinin inkişafı istiqamətində də mühüm addımlar atır. Bu yanaşma ölkənin enerji siyasətini daha dayanıqlı və gələcəyə hesablanmış edir. Prezident İlham Əliyevin səsləndirdiyi bu fikir, əslində, Azərbaycanın qlobal enerji sistemində oynadığı rolun qısa və dolğun ifadəsidir. Uzun illər ərzində həyata keçirilən məqsədyönlü siyasət nəticəsində Azərbaycan yalnız enerji ixrac edən ölkə deyil, həm də enerji təhlükəsizliyinin təminatçılarından biri kimi çıxış edir.
Bugünkü reallıq göstərir ki, enerji təhlükəsizliyi artıq təkcə iqtisadi məsələ deyil, həm də milli və regional təhlükəsizliyin əsas komponentidir. Azərbaycan isə bu sahədə etibarlı tərəfdaş kimi formalaşaraq həm regionda, həm də daha geniş coğrafiyada sabitliyə töhfə verməyə davam edir.
Zərdab rayon Salahlı kənd ümumi orta ümumtəhsil məktəbinin direktoru-Rəşad İsmayılov
