Rusiya ilə Avropa arasında birbaşa hərbi qarşıdurma ehtimalı var və vəziyyət müəyyən həddə çatarsa, hətta nüvə silahından istifadə ssenarisi də istisna edilə bilməz.
Xeberaz.info xarici agentliklərə istinadən xəbər verir ki, bunu Rusiya Beynəlxalq Məsələlər Şurasının prezidenti, politoloq Dmitri Trenin NEWS.am-ın “Güc faktoru” proqramında bildirib.
Trenin hesab edir ki, Avropa ölkələri Ukraynaya hərbi yardımın miqyasını tədricən artırmaqla Rusiyanın reaksiyasının sərhədlərini yoxlayırlar.
“Yardım zirehli jiletlər və dəbilqələrlə başladı, sonra tanklar, F-16 təyyarələri və sair gəldi. Onlar hər dəfə nəyin mümkün, nəyin mümkün olmadığını yoxlayırlar. Düşünürəm ki, hansısa məqamda həddi aşa və Rusiyanın hərbi doktrinasına uyğun cavabına səbəb ola bilərlər”, – Trenin deyib.
Rusiyalı politoloq daha sonra bundan da sərt ssenari səsləndirib. Onun fikrincə, eskalasiya davam edərsə, Rusiya Avropa dövlətlərinin ərazisinə birbaşa zərbələr endirə bilər.
“Müəyyən vəziyyətdə nüvə silahının tətbiqini də təsəvvür edə bilərəm”, – Trenin bildirib. Bununla belə, o, belə bir ssenarinin baş verməyəcəyinə ümid etdiyini əlavə edib.
Ekspert Ukrayna müharibəsini Rusiya ilə Qərb arasında daha geniş geosiyasi qarşıdurmanın bir hissəsi kimi qiymətləndirir və bu qarşıdurmanın onilliklərlə davam edə biləcəyini iddia edir.
Treninin fikrincə, ABŞ və Avropanın Rusiyaya münasibətində də müəyyən fərq var. O hesab edir ki, Vaşinqton Rusiyanı qlobal güc balansının bir elementi kimi qəbul edə bilər, Avropada isə Moskva ilə qarşıdurmaya daha sərt yanaşılır.
Politoloq Rusiya ilə Avropa arasında mümkün birbaşa müharibənin Ukraynadakı döyüşlərin sadəcə davamı olmayacağını da bildirib.
“Mən bu yaxınlarda Rusiyanın xarici işlər nazirinin çıxışını eşitdim. O deyirdi ki, Avropa ilə mümkün müharibə Ukraynadakı müharibənin sadəcə davamı olmayacaq, çox qısa müharibə olacaq və əsasən dronlarla aparılmayacaq”, – deyə Trenin bildirib.
Qeyd edək ki, Avropaya zərbələr və nüvə silahından mümkün istifadə ilə bağlı fikirlər Dmitri Treninin şəxsi qiymətləndirməsidir və açıqlamada Rusiyanın belə bir qərar qəbul etdiyi bildirilmir.
