23 iyun 2025-ci il tarixdə Zərdab rayonunda Dövlət Qulluqçularının Peşə Bayramı Günü qeyd edilib.
“Xeberaz.info” xəbər verir ki, əvvəlcə rayonun idarə, müəssisə və təşkilatlarında çalışan dövlət qulluqçuları Ümummilli liderimiz Heydər Əliyevin abidəsini ziyarət edib, önünə gül-çiçək dəstələri qoyublar. Dövlət Qulluqçularının Peşə Bayramı günü münasibətilə təşkil olunan toplantıda Zərdab Rayon İcra Hakimiyyətinin başçısı Mərdan Camalzadə çıxış edərək iştirakçıları bayram münasibətlə təbrik edib. Ölkəmizin beynəlxalq aləmdə öz nüfuzunun möhkəmləndirməsinin Ümummilli Lider Heydər Əliyevin dövlət idarəetmə sistemində həyata keçirdiyi islahatlardan başladığını qeyd edən natiq bildirib ki, cənab Prezident İlham Əliyevin bu islahatları qətiyyətlə davam etdirməsi sayəsində ölkəmizin qüdrəti gündən-günə daha da artmaqdadır. İcra başçısı çıxışında müəssisələrdə çalışan dövlət qulluqçularının rayonun sosial-iqtisadi və mədəni inkişafına çox böyük töhfələr verdiklərini qeyd edib.
Tədbirdə Rayon İcra Hakimiyyəti Başçısı Aparatının baş mütəxəssisi Kərim Umudov və Rayon İHB-nın Hüseynxanlı kənd İƏD üzrə nümayəndəsinin müavini Nahid Nuriyev rayonun ictimai həyatında fəal iştirak etdiklərinə görə Rayon İcra Hakimiyyətinin Fəxri Fərmanları ilə təltif olunublar. Çıxış edən dövlət qulluqçuları onların əməyinə verilən yüksək qiymətə görə ölkə rəhbərliyinə minnətdarlıqlarını bildiriblər.
