Zərdab rayonunda Dəli Quşçu kənd tam orta ümumtəhsil məktəbi üçün tikilmiş yeni binanın açılış mərasimi keçirilib.
Xeberaz.info xəbər verir ki, tədbirdə Rayon İcra Hakimiyyətinin başçısı Mərdan Camalzadə, millət vəkili Jalə Əliyeva, rayonun hüquq və mühafizə orqanlarının rəhbərləri, məktəbin pedaqoji kollektivi, şagirdlər və ictimaiyyət nümayəndələri iştirak ediblər. İlk öncə Dəli Quşçu kəndindən olan şəhidlərin xatirəsini əbədiləşdirmək üçün məktəbin həyətində tikilmiş abidənin önünə gül dəstələri qoyulub, xatirələri anılıb.
Zərdab Rayon İcra Hakimiyyətinin başçısı Mərdan Camalzadə çıxış edərək ilk növbədə “Bilik günü” münasibətilə məktəbliləri, valideyn və müəllimləri təbrik edib, onlara yeni dərs ilində uğurlar arzulayıb. Qeyd edib ki, son illərdə təhsil sahəsində qazanılan bütün uğurlar ölkə başçısı cənab İlham Əliyevin və Birinci vitse-prezident Mehriban xanım Əliyevanın rəhbərliyi ilə həyata keçirilən tədbirlərin nəticəsidir.
Millət vəkili Jalə Əliyeva əlamətdar gün münasibətilə şagirdlərə təbriklərini çatdırıb, həmçinin onlara yeni tədris ilində müvəffəqiyyətlər arzulayıb. O, dövlətimizin təhsilin inkişafına göstərdiyi diqqət və qayğıdan söz açaraq ölkəmizdə təhsilin keyfiyyətinin dünya standartlarına uyğunlaşdırılmasından, kadr potensialının gücləndirilməsindən danışıb.
Daha sonra çıxış edənlər yeni məktəbin istifadəyə verilməsi münasibətilə məktəb kollektivini təbrik edərək təhsil işçiləri və şagirdlərə yeni tədris ilində uğurlar arzulayıblar.
Rəmzi qırmızı lent kəsildikdən sonra qonaqlar məktəbdə yaradılmış şəraitlə tanış olublar.
Qeyd edək ki, 264 şagird yerlik məktəb binasında 13 sinif otağı, 1 məktəbəhazırlıq otağı, 3 laboratoriya, 2 texnologiya otağı, 1 informatika otağı, hərbi hazırlıq kabineti, kitabxana, akt zalı və yeməkxana fəaliyyət göstərəcək. Şagirdlərin idmanla məşğul olması üçün də geniş imkanlar yaradılıb. Məktəbdə 288 kvadratmetrlik əsas idman zalı, əlavə 28 kvadratmetrlik idman guşəsi və 2200 kvadratmetr sahəsi olan futbol meydançası istifadəyə verilib.
