Ukrayna prezidenti Vladimir Zelenski ölkənin bir neçə bölgəsinə Rusiya tərəfindən həyata keçirilən genişmiqyaslı hücum barədə məlumat yayıb.
”Xeberaz.info” xəbər verir ki, onun sözlərinə görə, Rusiya təxminən 36 raket və 600-ə yaxın dron buraxaraq mülki infrastruktur obyektlərini hədəfə alıb.
Zelenski bildirib ki, əsas zərbələr enerji sisteminə, yaşayış massivlərinə və digər mülki obyektlərə endirilib. Bir sıra yaşayış binaları dağılıb, çoxlu yanğınlar qeydə alınıb, fövqəladə xidmətlər bütün gecə boyu çalışıb.
İlkin məlumatlara əsasən, onlarla yaralı var və ən azı 3 nəfər həlak olub. Rəsmi qurumlar dağıntı altında qalanların ola biləcəyini istisna etmir və axtarış-xilasetmə işləri davam edir.
Ukrayna Energetika Nazirliyi hücumların bir neçə regionda elektrik təchizatında ciddi problemlərə səbəb olduğunu, bəzi şəhərlərdə isə fövqəladə kəsintilərin tətbiq edildiyini açıqlayıb.
Zelenski beynəlxalq tərəfdaşlara çağırış edərək bildirib ki, Rusiya ardıcıl olaraq mülki əhalini hədəfə alır və bu hücumların miqyası getdikcə genişlənir.
