Xalqımıza qarşı törədilmiş qanlı faciə.
Tarix bəzən yaddaşlara silinməz izlər buraxan hadisələrlə dolu olur. Azərbaycan xalqının taleyində bu cür ağrılı səhifələrdən biri də hər il 31 mart tarixində anılan Azərbaycanlıların Soyqırımı Günü ilə bağlıdır. Bu gün, XX əsrin əvvəllərində xalqımıza qarşı törədilmiş kütləvi qırğınların, amansız zorakılıqların və insanlığa sığmayan cinayətlərin xatirəsini yaşadır.1918-ci ilin mart-aprel aylarında baş verən hadisələr Azərbaycanın müxtəlif bölgələrində dinc əhaliyə qarşı həyata keçirilmiş genişmiqyaslı zorakılıq aktları ilə yadda qaldı. Xüsusilə Bakı, Şamaxı, Quba və digər bölgələrdə minlərlə günahsız insan yalnız milli kimliyinə görə qətlə yetirildi. Yaşından, cinsindən asılı olmayaraq insanlar xüsusi qəddarlıqla öldürüldü, yaşayış məntəqələri dağıdıldı, mədəni və dini abidələr məhv edildi.
Bu hadisələrin miqyası və qəddarlığı onu göstərir ki, məqsəd təkcə fiziki məhvetmə deyil, eyni zamanda xalqın tarixi yaddaşını, mədəni irsini silmək idi. Bu baxımdan baş verənlər yalnız bir xalqın faciəsi deyil, bütövlükdə bəşəriyyətə qarşı törədilmiş cinayət kimi qiymətləndirilməlidir. Sonrakı illərdə aparılan araşdırmalar, arxiv sənədləri və aşkar edilən faktlar bu qanlı hadisələrin real mahiyyətini ortaya qoymuşdur. Xüsusilə Quba Soyqırımı Memorial Kompleksi ərazisində tapılan kütləvi məzarlıqlar həmin dövrdə törədilən vəhşiliklərin canlı sübutudur. Bu tapıntılar tariximizin acı həqiqətlərini gələcək nəsillərə çatdırmaq baxımından mühüm əhəmiyyət daşıyır. Bu gün Azərbaycan dövləti və xalqı həmin faciənin unudulmaması, ona obyektiv hüquqi-siyasi qiymət verilməsi istiqamətində mühüm addımlar atır. Beynəlxalq ictimaiyyətin bu hadisələr barədə məlumatlandırılması, ədalətin bərpa olunması üçün görülən işlər davam etdirilir.
31 mart yalnız matəm günü deyil, həm də yaddaş və ibrət günüdür. Bu tarix bizə xatırladır ki, tarixdən dərs çıxarmaq, milli birliyimizi qorumaq və gələcək nəsilləri belə faciələrdən uzaq tutmaq hər birimizin borcudur. Xalqımıza qarşı törədilmiş bu qanlı faciə heç vaxt unudulmayacaq. O, tariximizin ağrılı, lakin eyni zamanda bizi daha güclü və birləşmiş edən səhifələrindən biri kimi daim yadda qalacaq.
Zərdab rayon Hüseynxanlı kənd ümumi orta ümumtəhsil məktəbinin müəllimi-Əfsun Nuriyev
