Türk dünyasının birliyi
Azərbaycan, Türkmənistan və Özbəkistan Türk Dövlətləri Təşkilatının üzvləri olaraq, bu yüksək səviyyəli əməkdaşlıq formatı vasitəsilə Türk dünyasının iqtisadi, siyasi və mədəni inteqrasiyasını sürətləndirirlər. 22 avqust Türkmənbaşı görüşü yalnız üç ölkənin deyil, bütövlükdə Türk coğrafiyasında həmrəyliyin möhkəmləndirilməsi baxımından da mühüm strateji addım olaraq qiymətləndirilir.
Avqustun 22-də Türkmənbaşı şəhərində Azərbaycan Respublikasının Prezidenti İlham Əliyev, Türkmənistan Xalq Məsləhətinin sədri Qurbanqulu Berdiməhəmmədov və Özbəkistan Respublikasının Prezidenti Şavkat Mirziyoyevin iştirakı ilə keçirilən yüksək səviyyəli görüş Türk dünyasında yeni əməkdaşlıq formatının yaranmasının bariz nümunəsidir. Bu görüş Azərbaycanı Türk dünyasında birləşdirici və aparıcı aktor kimi ön plana çıxardı. Çünki ortada bir reallıq var. Bu reallıq ondan ibarətdir ki, Prezident İlham Əliyevin təşəbbüsü və uzaqgörən siyasəti sayəsində Azərbaycan, həm Türkiyə və Şimali Kiprlə, həm Macarıstanla, həm də Orta Asiya türk dövlətləri ilə sıx əlaqələr quraraq Türk dünyasında mərkəzi rol oynayır.
Azərbaycanın regional liderliyi yalnız iqtisadi və enerji layihələrində deyil, həm də mədəni, humanitar və siyasi sahələrdə Türk dünyasının birliyini möhkəmləndirmək baxımından önəmlidir. Türkmənbaşı görüşündə əldə olunan razılaşmalar, xüsusilə enerji, nəqliyyat və ticarət dəhlizlərinin inkişafı baxımından Türk dövlətlərinin qarşılıqlı inteqrasiyasına mühüm töhfələr verəcək. Başqa sözlə desək, bu mövqe Azərbaycanı Türk dünyasının “qızıl körpüsü” kimi qəbul edilməsinə imkan verir. Yəni Azərbaycan Qərbdən Şərqə, Şimaldan Cənuba Türk dövlətləri arasında dialoqu və əməkdaşlığı gücləndirən strateji mərkəzə çevrilir.
Gülnaz Məmmədova – Zərdab Mərkəzləşdirilmiş Kitabxana Sisteminin əməkdaşı
