Slovakiya son illərdə Mərkəzi Avropanın dinamik inkişaf edən ölkələrindən birinə çevrilib. Artan siyasi sabitlik, iqtisadi islahatlar, texnologiya və sənaye sahəsində əldə olunan nailiyyətlər Slovakiyanın inkişaf modelini həm region, həm də Avropa miqyasında nümunəvi edir. Azərbaycan üçün dost ölkə olan Slovakiyanın uğurlu inkişafı bizi xüsusilə məmnun edir. Bu, təkcə strateji tərəfdaşlığın daha da dərinləşməsinə deyil, həm də iki xalq arasında dostluğun möhkəmlənməsinə xidmət edir.
Slovakiya iqtisadiyyatı uzun müddətdir davamlı artım templəri nümayiş etdirir. Avtomobil sənayesinin inkişafı, yüksək texnologiyaların tətbiqi, xarici sərmayənin cəlbi ölkənin iqtisadi modernizasiyasını sürətləndirib. “Avropanın avtomobil ürəyi” adlandırılan Slovakiya, “Volkswagen”, “Kia”, “Peugeot” kimi dünya nəhənglərinin istehsal mərkəzlərindən birinə çevrilib. Bu sahədə əldə olunan uğurlar həm iqtisadi sabitlik gətirib, həm də ölkənin ixrac gücünü artırıb.
Slovakiyanın inkişaf strategiyası innovasiyaların geniş tətbiqi, rəqəmsal texnologiyalara keçid, yaşıl enerji ilə bağlı layihələrin dəstəklənməsi üzərində qurulub. Bu yanaşma onu yeni dünya iqtisadi reallıqlarına uğurla adaptasiya edən müasir Avropa dövlətinə çevirib.
Ölkənin uğurlu inkişafı yalnız iqtisadi göstəricilərlə məhdudlaşmır. Təhsil sisteminin yenilənməsi, sosial təminat mexanizmlərinin təkmilləşdirilməsi, səhiyyə sektorunda modern infrastrukturun qurulması Slovakiyanın rifah modelini daha da gücləndirir. İnsan kapitalına yatırılan bu investisiyalar uzunmüddətli dayanıqlı inkişafın əsas şərti sayılır.
Slovakiya gənclərinin yüksək təhsil səviyyəsi, elm və texnologiyaya marağı ölkənin innovativ cəmiyyətə çevrilməsində mühüm rol oynayır. Bu, həmçinin Azərbaycan-Slovakiya əməkdaşlığının yeni istiqamətlərini müəyyənləşdirmək baxımından böyük imkanlar yaradır.
Slovakiyanın uğurlu inkişafı Azərbaycan üçün də sevindiricidir. Çünki regionda sabit və inkişaf edən tərəfdaşların mövcudluğu ikitərəfli münasibətlərin davamlı genişlənməsini şərtləndirir. Enerji, müdafiə sənayesi, nəqliyyat-logistika, kənd təsərrüfatı, rəqəmsal texnologiyalar kimi sahələrdə əməkdaşlığın daha da inkişaf etməsi üçün geniş platforma mövcuddur.
Slovakiyanın Cənubi Qafqaza artan marağı, Azərbaycanın isə Mərkəzi Avropa ilə əlaqələrini gücləndirmək siyasəti iki ölkə arasında strateji tərəfdaşlığın daha yüksək səviyyəyə yüksəlməsinə şərait yaradır. Bu gün Slovakiya Azərbaycanın yaxın dostlarından biri kimi tanınır və qarşılıqlı münasibətlər etimad, hörmət və ortaq maraqlar üzərində formalaşır.
Slovakiyanın Avropa İttifaqı və NATO məkanında sabit, məsuliyyətli və etibarlı tərəfdaş kimi mövqeyini möhkəmləndirməsi beynəlxalq arenada onun nüfuzunu artırır. Bu, regionda dayanıqlı təhlükəsizlik arxitekturasına mühüm töhfə verir. Azərbaycanın balanslaşdırılmış xarici siyasəti ilə Slovakiyanın praqmatik diplomatiyası arasında ciddi uzlaşma mövcuddur. Bu da iki ölkə arasında siyasi dialoqun keyfiyyətini artırır.
Slovakiyanın uğurlu inkişafı təkcə bu ölkənin daxili rifahını artırmır, həm də Avropa regionunun sabitliyinə mühüm təsir göstərir. Bu inkişafın Azərbaycanla münasibətlərə də müsbət şəkildə yansıması bizi xüsusilə məmnun edir.
Gülağa İgəndərov – Zərdab Rayon Təhsil Sektorunun müdiri
