Rəqəmsal İnkişaf – Azərbaycanın Dayanıqlı Gələcəyinin Strateji Yol Xəritəsi
Müasir dövrdə qlobal miqyasda baş verən sürətli texnoloji dəyişikliklər dövlətlərin inkişaf strategiyalarını yenidən nəzərdən keçirməsini zəruri edir. İlham Əliyev tərəfindən dəfələrlə vurğulandığı kimi, hər dövrün öz tələbləri var və XXI əsrdə 1990-cı illərin yanaşmaları ilə uğur qazanmaq mümkün deyil. Əvvəlki mərhələlərdə əldə olunmuş nailiyyətlər Azərbaycanın müstəqil dövlət kimi formalaşması və güclənməsi üçün möhkəm təməl rolunu oynayıb. Lakin bu gün qarşıda duran əsas vəzifə həmin təməl üzərində yeni inkişaf modelinin qurulmasıdır.
Fevralın 11-də Prezident İlham Əliyevin sədrliyi ilə keçirilən “Azərbaycanın yeni rəqəmsal arxitekturası” mövzusunda müşavirə məhz bu baxımdan xüsusi əhəmiyyət daşıyır. Müşavirədə rəqəmsal inkişafın gələcək iqtisadi artımın əsas hərəkətverici qüvvəsinə çevrildiyi vurğulandı. Qeyd olundu ki, süni intellektin tətbiqi, böyük həcmli məlumatların (big data) idarə olunması, data mərkəzlərinin yaradılması və rəqəmsal transformasiya prosesləri artıq dünya dövlətlərinin rəqabət qabiliyyətini müəyyən edən əsas meyarlardır.
Azərbaycan son illərdə bu istiqamətdə mühüm addımlar atmışdır. Elektron hökumət sisteminin genişləndirilməsi, dövlət xidmətlərinin rəqəmsallaşdırılması, fiber-optik infrastrukturun inkişafı və beynəlxalq texnoloji şirkətlərlə əməkdaşlıq buna misaldır. Lakin qarşıdakı mərhələdə əsas məqsəd bu sahədə pərakəndəliyin aradan qaldırılması və vahid koordinasiya mexanizminin formalaşdırılmasıdır. Dövlət başçısının “mygov” platforması üzərindən bütün dövlət xidmətlərinin mərkəzləşdirilməsi ilə bağlı tapşırığı vətəndaş məmnuniyyətinin artırılması və idarəetmədə şəffaflığın təmin olunması baxımından mühüm əhəmiyyət daşıyır.
Eyni zamanda, nəqliyyat və energetika dəhlizlərinin gələcəkdə fiber-optik dəhlizlərə çevrilməsi təşəbbüsü Azərbaycanın regionda rəqəmsal tranzit mərkəzinə çevrilməsi perspektivini gücləndirir. Bu, ölkəmizin coğrafi üstünlüyünün texnoloji üstünlüyə transformasiyası deməkdir. Hesab edirəm ki, rəqəmsal inkişaf yalnız texnoloji yenilənmə deyil, həm də milli təhlükəsizlik, iqtisadi müstəqillik və sosial rifah məsələsidir. Bu sahənin prioritet elan edilməsi Azərbaycanın uzunmüddətli, dayanıqlı və rəqabətqabiliyyətli inkişaf strategiyasının əsas sütunlarından birinə çevrilmişdir.
Gülnaz Məmmədova – Zərdab şəhər sakini, təqaüdçü
