Azərbaycan və Qazaxıstan xalqları arasında dostluq və qardaşlıq münasibətləri dərin tarixi köklərə malikdir. Hər iki xalq əsrlər boyu ortaq mədəniyyətin, dilin, adət-ənənələrin daşıyıcısı olub. Bu mənəvi bağlar bu gün dövlətlərimizin münasibətlərində də öz əksini tapır. Azərbaycan Prezidenti İlham Əliyevin Qazaxıstana səfəri zamanı səsləndirdiyi “Qardaş Qazaxıstan Qarabağın bərpasında bizim yanımızdadır” fikri bu birliyin və etimadın parlaq göstəricisidir. 44 günlük Vətən müharibəsindən sonra əldə olunan tarixi Zəfər Azərbaycan xalqına illərlə arzuladığı Qarabağı yenidən qazandırdı. İndi azad torpaqlarımızda genişmiqyaslı bərpa və quruculuq işləri aparılır. Bu işlərdə təkcə Azərbaycan deyil, onun dost və qardaş ölkələri də iştirak edir. Qazaxıstan hökumətinin təşəbbüsü ilə Füzuli şəhərində “Qazaxıstan adına Uşaq Yaradıcılıq Mərkəzi”nin tikilməsi bu dostluğun, həm də türk birliyinin bariz nümunəsidir. Bu layihə uşaqların yaradıcılıq potensialının inkişafına, azad Qarabağda mədəni həyatın dirçəlməsinə böyük töhfə verəcək. Qazaxıstanın bu addımı sadəcə maddi yardım deyil, mənəvi dayaq və səmimi qardaşlıq jestidir. Prezident Qasım-Jomart Tokayevin söylədiyi kimi, “Azərbaycanın Qarabağda gördüyü işlər bütün türk dünyasının qürur mənbəyidir.” Bu kimi sözlər türk dövlətləri arasında həmrəyliyin və qarşılıqlı dəstəyin rəmzidir. Türk Dövlətləri Təşkilatı çərçivəsində aparılan əməkdaşlıq da bu birliyi daha da gücləndirir. Qazaxıstanın təşəbbüsləri göstərir ki, bu dövlət Qarabağın bərpasını yalnız Azərbaycan məsələsi deyil, ümumtürk həmrəyliyinin təntənəsi kimi görür. Bu dəstək həm siyasi, həm də mənəvi baxımdan mühüm əhəmiyyət daşıyır. Siyasi baxımdan, bu, regionda sabitliyin və sülhün möhkəmlənməsinə xidmət edir. Mənəvi cəhətdən isə türkdilli xalqlar arasında qardaşlıq bağlarını daha da gücləndirir. Qarabağda həyatın yenidən bərqərar olması təkcə Azərbaycanın deyil, bütün türk dünyasının sevinci və iftixar mənbəyidir. Bu gün Qarabağ torpaqlarında yenidən həyat qaynayır, şəhərlər və kəndlər bərpa olunur, yollar, məktəblər, mədəniyyət ocaqları tikilir. Qazaxıstanın bu prosesdə iştirakı göstərir ki, türk dövlətləri bir-birinə yalnız sözlə deyil, əməl ilə də dəstək verirlər. Bu həmrəylik gələcək nəsillərə örnək olacaq, türklüyün birliyini daha da möhkəmləndirəcək. Qardaş Qazaxıstan xalqına göstərdiyi səmimi dəstəyə görə dərin minnətdarlıq hissi keçiririk. Qarabağın dirçəlişi prosesi birliyin, qarşılıqlı hörmətin və mənəvi bağlılığın təntənəsidir. Bu dostluq körpüsü türk dünyasının gələcəyinə inam, sabaha ümid və qardaş xalqlar arasında əbədi birlik mesajıdır.
Zərdab şəhər Ş. Qurbanov adına 2 nömrəli tam orta məktəbin müəllimi Ağayeva Rüxsanə Maarif qızı
