II Qarabağ müharibəsi zamanı siyasi əqidəsindən, statusundan, vəzifəsindən, milli mənsubiyyətindən asılı olmayaraq hər bir Azərbaycan vətəndaşı milli həmrəylik nümayiş etdirdi
2020-ci ildə baş vermiş II Qarabağ müharibəsi Azərbaycan xalqının müasir tarixində misilsiz milli həmrəylik, güclü siyasi iradə və sarsılmaz vətənpərvərlik nümunəsi kimi xüsusi yer tutur. Bu müharibə göstərdi ki, Azərbaycan cəmiyyəti taleyüklü məqamlarda siyasi əqidəsindən, sosial statusundan, tutduğu vəzifədən və milli mənsubiyyətindən asılı olmayaraq vahid amal uğrunda birləşməyi bacarır. Torpaqlarımızın azadlığı uğrunda aparılan Vətən müharibəsi xalq–dövlət birliyinin ən parlaq təzahürü oldu. Müharibənin ilk günlərindən etibarən ölkədə müşahidə olunan milli həmrəylik Azərbaycanın güc mənbəyini bir daha ortaya qoydu. Cəmiyyətin bütün təbəqələri – gənclər, ziyalılar, şəhid ailələri, qazilər, diaspor nümayəndələri və sadə vətəndaşlar eyni mövqedən çıxış edərək dövlətin və ordunun yanında olduqlarını qətiyyətlə bəyan etdilər. Bu birlik və mənəvi səfərbərlik ordumuzun döyüş meydanındakı uğurlarına güclü ruh yüksəkliyi verdi. Vətən müharibəsi müddətində xalqımız hər gün öz rəhbərinin yenilməz qətiyyətinə, siyasi iradəsinə və prinsipial mövqeyinə şahidlik etdi. Prezident, Ali Baş Komandan İlham Əliyev müharibənin ilk günündən etibarən xalqın qarşısında açıq, inamlı və qəti mövqe nümayiş etdirdi. Onun həm cəbhədə, həm də beynəlxalq siyasi müstəvidə apardığı ardıcıl və məqsədyönlü siyasət müharibənin taleyini müəyyən edən əsas amillərdən biri oldu. Prezident cənab İlham Əliyevin müharibə dövründə xalqa etdiyi müraciətlər, beynəlxalq media qurumlarına verdiyi müsahibələr və sərgilədiyi prinsipial mövqe Azərbaycan cəmiyyətində böyük ruh yüksəkliyi yaratdı. Dövlət başçısının hər çıxışı xalqın qələbəyə olan inamını daha da möhkəmləndirir, düşmən üzərində qələbənin qaçılmaz olduğunu nümayiş etdirirdi. Bu qətiyyət xalqımızı torpaqlarımızın azadlığı uğrunda mübarizədə daha da həmrəy etdi.
Ali Baş Komandanın ilk gündən nümayiş etdirdiyi hərbi-siyasi əzm hər bir azərbaycanlını öz rəhbərinin ətrafında daha sıx birləşdirdi. Prezident cənab İlham Əliyevin vətənpərvərliyi, dövlətçilik mövqeyi və tarixi məsuliyyəti öz üzərinə götürməsi xalq üçün nümunə oldu. Bu nümunə müharibə şəraitində cəmiyyətin bütün resurslarının səfərbər olunmasına, vahid məqsəd naminə səylərin birləşdirilməsinə şərait yaratdı.
II Qarabağ müharibəsi həm də sübut etdi ki, Azərbaycanın gücü təkcə müasir silahlarda və peşəkar orduda deyil, eyni zamanda milli ruhda, xalqın birliyində və liderə olan sarsılmaz etimadda cəmləşmişdir. Müharibə dövründə xalqla Prezident arasında formalaşan mənəvi bağ tariximizin ən möhkəm siyasi-ictimai dayaqlarından birinə çevrildi. Bu bağ Azərbaycan dövlətçiliyinin gələcək inkişafı üçün də mühüm əhəmiyyət daşıyır.
Qələbə ilə başa çatan Vətən müharibəsi Azərbaycan xalqının milli kimliyini, dövlətçilik şüurunu və vətənpərvərlik hisslərini daha da gücləndirdi. Bu Qələbə təsadüfi deyildi; o, uzun illər ərzində aparılan düşünülmüş siyasətin, ordu quruculuğunun və milli ideologiyanın məntiqi nəticəsi idi. Prezident İlham Əliyevin rəhbərliyi altında formalaşan güclü dövlət modeli müharibə şəraitində özünü tam doğrultdu.
Bu gün II Qarabağ müharibəsi Azərbaycanın müasir tarixində təkcə hərbi zəfər kimi deyil, həm də milli həmrəyliyin, lider-xalq birliyinin və siyasi iradənin təntənəsi kimi dəyərləndirilir. Bu birlik və qətiyyət gələcək nəsillər üçün nümunədir. Azərbaycan xalqı bir daha sübut etdi ki, güclü lider ətrafında birləşdikdə, haqq yolunda apardığı mübarizədə məğlubedilməz olur.
II Qarabağ müharibəsi Azərbaycan xalqının iradəsinin, Ali Baş Komandan İlham Əliyevin qətiyyətli rəhbərliyinin və milli həmrəyliyin parlaq təcəssümüdür. Bu tarixi Qələbə dövlətimizin gücünü və xalqımızın sarsılmaz birliyini bütün dünyaya nümayiş etdirmişdir.
Zərdab rayon Heydər Əliyev Mərkəzinin əməkdaşı Alagöz Namazova
