“Ədaləti biz özümüz bərpa etdik” ifadəsi Azərbaycan xalqının uzun illər davam edən ədalətsizliklərlə mübarizədə göstərdiyi milli birlik, siyasi iradə və qətiyyətin nəticəsini ifadə edir; bu fikir xüsusilə torpaqların azad olunması və ərazi bütövlüyünün təmin edilməsi fonunda tarixi-siyasi məna kəsb edir. XX əsrin sonlarında baş verən münaqişələr nəticəsində Azərbaycanın bir sıra əraziləri işğal altına düşmüş, yüz minlərlə insan doğma yurdlarından didərgin salınmışdır. Bu vəziyyət həm beynəlxalq hüquq normalarına, həm də ədalət prinsipinə zidd idi. Uzun illər ərzində məsələ beynəlxalq təşkilatların gündəmində qalsa da, real nəticə əldə olunmamışdır. Bu dövrdə Azərbaycan dövləti siyasi, iqtisadi və hərbi gücünü möhkəmləndirməyə, beynəlxalq mövqeyini gücləndirməyə və diplomatik mübarizəni davam etdirməyə yönəlmiş strategiya həyata keçirmişdir. 2020-ci ildə baş vermiş 44 günlük müharibə nəticəsində Azərbaycan öz ərazi bütövlüyünü böyük ölçüdə bərpa etmişdir. Bu proses Azərbaycan tarixində yeni mərhələnin başlanğıcı kimi qiymətləndirilir. Müharibə yalnız hərbi əməliyyat deyil, həm də milli həmrəyliyin, xalq–ordu birliyinin və dövlət iradəsinin təzahürü olmuşdur. Azərbaycan Ordusunun qazandığı uğurlar ölkənin müasir hərbi gücünün və strateji hazırlığının göstəricisi idi. Uzun illər danışıqlar yolu ilə həll olunmayan problem nəticə etibarilə Azərbaycanın siyasi və hərbi qətiyyəti ilə öz həllini tapmışdır. Bu prosesin davamı olaraq azad olunmuş ərazilərdə genişmiqyaslı bərpa və quruculuq işləri həyata keçirilir. İnfrastruktur layihələri, yollar, məktəblər, xəstəxanalar, yaşayış kompleksləri inşa olunur, keçmiş məcburi köçkünlərin doğma torpaqlarına qayıdışı təmin edilir. Bu mərhələ ədalətin yalnız hərbi yox, həm də sosial və humanitar müstəvidə bərpası deməkdir. Çünki ədalət yalnız torpağın azad olunması deyil, həm də insanların öz yurdlarına ləyaqətlə qayıtması və təhlükəsiz həyat şəraitinin yaradılmasıdır. Eyni zamanda, bu ifadə milli özünüdərkin və vətənpərvərlik şüurunun güclənməsini simvolizə edir. Müharibə dövründə cəmiyyətin bütün təbəqələri vahid məqsəd ətrafında birləşmiş, informasiya və diplomatik müstəvidə də fəal mövqe sərgiləmişdir. Bu birlik və həmrəylik gələcək inkişaf üçün də mühüm əsas yaratmışdır. “Ədaləti biz özümüz bərpa etdik” fikri Azərbaycan xalqının tarixi iradəsini, milli birliyini və suveren hüquqlarını qorumaq əzmini ifadə edir. Bu, təkcə keçmişin qiymətləndirilməsi deyil, həm də gələcək nəsillərə ötürülən bir mesajdır: dövlətin müstəqilliyi, ərazi bütövlüyü və milli maraqları qorunmalı və daim müdafiə olunmalıdır.
Zərdab rayon Heydər Əliyev Mərkəzinin əməkdaşı İmanova Xanım
