Dövlət siyasətində idmanın yeri və əhəmiyyəti
Müasir dövrdə idman yalnız fiziki fəaliyyət sahəsi deyil, həm də cəmiyyətin sağlamlığı, gəncliyin formalaşması, milli nüfuzun möhkəmləndirilməsi və dövlətin beynəlxalq imicinin gücləndirilməsi baxımından strateji əhəmiyyət daşıyan sahələrdən biridir. Azərbaycanda idmanın inkişafı təsadüfi təşəbbüslər üzərində deyil, ardıcıl, məqsədyönlü və sistemli dövlət siyasəti əsasında həyata keçirilir. Bu siyasət çərçivəsində dövlət xətti ilə çoxsaylı proqramlar icra edilmiş, geniş infrastruktur yaradılmış və idman ölkənin sosial həyatının ayrılmaz hissəsinə çevrilmişdir.
Azərbaycan Respublikasında idmanın inkişafı milli maraqlara xidmət edən əsas istiqamətlərdən biri kimi müəyyən edilmişdir. Dövlət idmanı sağlam cəmiyyətin təməli, gənclərin mənəvi və fiziki tərbiyəsinin əsas vasitəsi, eyni zamanda vətənpərvərlik ruhunun gücləndirilməsi amili kimi qiymətləndirir. Bu yanaşma idmanın təkcə yarış və nəticə deyil, həm də ideoloji, sosial və strateji mahiyyət daşıdığını göstərir.
Ulu Öndər Heydər Əliyevin hakimiyyətə qayıdışından sonra idman sahəsində əsaslı dönüş baş vermiş, bu sahə dövlətin birbaşa himayəsinə götürülmüşdür. Məhz həmin dövrdən etibarən idman sahəsində qanunvericilik bazası formalaşdırılmış, federasiyalar gücləndirilmiş, idmançılara dövlət qayğısı sistemi yaradılmışdır.
Azərbaycanda idmanın inkişafı məqsədilə müxtəlif illərdə dövlət proqramları, konsepsiyalar və strateji sənədlər qəbul edilmişdir. Bu proqramlar idmanın kütləviliyinin artırılması, regionlarda idman imkanlarının bərabərləşdirilməsi, uşaq-gənclər idmanının inkişafı və peşəkar idmançı hazırlığının gücləndirilməsini əhatə edir.
Xüsusi olaraq qeyd etmək lazımdır ki, dövlət proqramları yalnız idmançıların yetişdirilməsinə deyil, həm də idman infrastrukturlarının tikintisinə, idman mütəxəssislərinin hazırlanmasına, məktəblərdə və ali təhsil müəssisələrində idmanın təşviqinə, sağlam həyat tərzinin təbliğinə xidmət edir. Bu yanaşma idmanı dar bir çevrədən çıxararaq ümummilli dəyərə çevirmişdir.
Dövlət siyasətinin mühüm istiqamətlərindən biri idmanın paytaxtla məhdudlaşmaması, ölkənin bütün bölgələrini əhatə etməsidir. Son illər ərzində Azərbaycanın müxtəlif şəhər və rayonlarında Olimpiya İdman Kompleksləri, stadionlar, üzgüçülük hovuzları, güləş və boks zalları, uşaq-gənclər idman məktəbləri inşa edilmiş və istifadəyə verilmişdir.
Bu infrastruktur region gənclərinin idmana cəlb olunmasına, istedadlı idmançıların üzə çıxmasına və sosial bərabərliyin təmin olunmasına mühüm töhfə vermişdir. Regionlarda yaradılan idman şəraiti həm də sosial aktivliyin artmasına, gənclərin zərərli vərdişlərdən uzaqlaşmasına xidmət edir.
Kəmalə Əliyeva – Zərdab rayonu, Qaravəlli kənd orta ümumtəhsil məktəbinin direktoru
