Bizim siyasətimizin əsas istiqamətlərindən biri də gəncləri sağlam ruhda tərbiyə etməkdir, vətənpərvərlik ruhunda tərbiyə etməkdir ki, gənclər Vətən sevgisi ilə böyüsünlər, tərbiyə alsınlar və beləliklə, ölkəmizin inkişafı daimi olsun, əbədi olsun
Müasir dövrdə hər bir dövlətin davamlı və uğurlu inkişafı bilavasitə gənc nəslin hansı dəyərlər üzərində formalaşmasından asılıdır. Azərbaycanda gənclərin sağlam, fiziki cəhətdən möhkəm, mənəvi baxımdan saf və vətənpərvər ruhda tərbiyə edilməsi dövlət siyasətinin əsas prioritet istiqamətlərindən biri kimi müəyyən edilmişdir. Bu yanaşma ölkənin gələcəyinin etibarlı əllərdə olmasını təmin edən strateji baxışın təzahürüdür.
Prezident cənab İlham Əliyevin rəhbərliyi ilə həyata keçirilən dövlət siyasətinin mərkəzində insan amili, xüsusilə gənclərin hərtərəfli inkişafı dayanır. Gənclərin Vətən sevgisi ilə böyüməsi, milli-mənəvi dəyərlərə bağlı, məsuliyyətli və fəal vətəndaşlar kimi formalaşması ölkənin uzunmüddətli inkişafının əsas təminatıdır. Bu məqsədlə həyata keçirilən proqramlar gənclərin həm fiziki hazırlığını, həm də mənəvi tərbiyəsini vəhdət halında inkişaf etdirməyə yönəlmişdir. Cəmiyyətdə mövcud olan müsbət mənəvi-psixoloji mühit bu prosesdə xüsusi rol oynayır. Azərbaycan xalqının nümayiş etdirdiyi həmrəylik və yüksək vətənpərvərlik ruhu gənc nəslin formalaşmasına güclü təsir göstərir. Son illərdə baş verən tarixi hadisələr, xüsusilə Vətən müharibəsində əldə olunan şanlı Zəfər bir daha sübut etdi ki, gənclərimiz milli maraqlar uğrunda bir yumruq kimi birləşməyi bacarır, Vətən qarşısında məsuliyyətini dərk edir.
Gənclərin fiziki hazırlığı ilə mənəvi saflığının vəhdəti uğurlu inkişafın əsas şərtidir. Bu baxımdan idmanın gənc nəslin tərbiyəsində rolu əvəzsizdir. İdman gənclərdə iradə, dözümlülük, intizam, komanda ruhu və vətənə bağlılıq kimi keyfiyyətlərin formalaşmasına xidmət edir. Eyni zamanda, sağlam həyat tərzinin təşviqi gənclərin zərərli vərdişlərdən uzaq olmasına, sağlam düşüncəyə malik vətəndaşlar kimi yetişməsinə şərait yaradır.
Azərbaycanda idmanın inkişafı dövlət tərəfindən xüsusi diqqət mərkəzində saxlanılır. Ölkənin bütün bölgələrində yaradılmış müasir idman infrastrukturu, Olimpiya İdman kompleksləri, uşaq-gənclər idman məktəbləri gənclərin idmana cəlb olunmasına geniş imkanlar yaradır. Bu obyektlər yalnız fiziki hazırlıq mərkəzləri deyil, eyni zamanda vətənpərvərlik ruhunun aşılandığı tərbiyə ocaqları kimi fəaliyyət göstərir.
Xüsusi qeyd edilməlidir ki, gənclərin vətənpərvərlik ruhunda tərbiyəsi yalnız fiziki hazırlıqla məhdudlaşmır. Təhsil müəssisələrində, ictimai təşkilatlarda, mədəni və idman tədbirlərində milli tariximizin, qəhrəmanlıq salnaməmizin, şəhidlərimizin xatirəsinin təbliği gənclərdə Vətənə bağlılıq hissini daha da gücləndirir. Bu vəhdət – sağlam bədən və sağlam düşüncə – güclü dövlətin əsasını təşkil edir.
Azərbaycanda gənclərin sağlam və vətənpərvər ruhda tərbiyə olunması ardıcıl və sistemli dövlət siyasəti ilə təmin edilir. Fiziki hazırlıqla mənəvi dəyərlərin uzlaşdırılması ölkənin davamlı və əbədi inkişafının əsas təminatıdır. Bu siyasət gəncləri gələcəyin layiqli vətəndaşları, dövlətçiliyin etibarlı dayaqları kimi formalaşdırır və Azərbaycanın parlaq sabahına möhkəm zəmin yaradır.
Zərdab rayon Heydər Əliyev Mərkəzinin direktoru Könül Rəhimova
