Azərbaycanın qazandığı parlaq Qələbə dünya hərb tarixində özünəməxsus hadisə kimi qiymətləndirilir. Çünki bu Zəfər yalnız döyüş meydanında deyil, xalqın ruhunda, milli ideyada, iqtisadi və mənəvi gücdə qazanılmış bir qələbə idi. Bu qələbənin arxasında illərlə qurulan güclü ordu, sabit və dayanıqlı iqtisadiyyat, həmçinin, vətəndaşların dövlətə inamı dayanırdı. Müstəqilliyin ilk illərində üzləşdiyimiz çətinlikləri, işğalın ağrılarını yaşayan Azərbaycan xalqı, Prezident İlham Əliyevin rəhbərliyi ilə bu gün öz torpaqlarında qalib xalq kimi yaşayır. Qələbənin qazanılmasında hər bir vətəndaşın payı var – ön cəbhədə vuruşan əsgərdən tutmuş, arxa cəbhədə çalışan, dua edən, dövlətinə güvənən hər bir insan bu böyük tarixə öz izini qoydu.
Vətəndaş kimi bu sözlər bizdə dərin fəxr və məsuliyyət hissi oyadır. Çünki “Bizim qədər parlaq, tam və mütləq Qələbə qazanan ikinci ölkə olmayıb” demək, həm də bu Qələbəni qorumaq, onu davam etdirmək öhdəliyidir. Bu gün azad edilmiş torpaqlarda aparılan bərpa və quruculuq işləri, köç prosesləri, yeni həyatın başlanması bu Qələbənin təbii davamıdır. Qarabağda, Şərqi Zəngəzurda ucaldılan məktəblər, yollar, sənaye müəssisələri həm iqtisadi, həm də mənəvi dirçəlişin simvoludur.
Hər bir Azərbaycan vətəndaşı bu quruculuq prosesinə öz sahəsində töhfə verməklə Zəfər ruhunu yaşadır. Bu, artıq yalnız dövlətin işi deyil — bu, bütöv bir xalqın missiyasıdır. Qələbə ruhu bizim gündəlik həyatımıza, düşüncəmizə, əməyimizə hopmalıdır. Çünki Vətən uğrunda döyüş meydanında qazandığımız qələbəni indi sülh və inkişaf meydanında davam etdirmək bizim vətəndaş borcumuzdur. Bu gün dünya dəyişir, beynəlxalq münasibətlərdə güc amili ön plana çıxır. Amma Azərbaycanın gücü yalnız ordusunda deyil — xalqının birliyində, dövlətinə sədaqətində və milli həmrəyliyindədir. Bizim Qələbəmiz bu birliyin nəticəsi idi və o, gələcək nəsillərə örnək olacaq. Prezident İlham Əliyevin sözləri hər bir azərbaycanlı üçün fəxarət, eyni zamanda məsuliyyət çağırışıdır. Biz bu Qələbəni qorumaqla həm də Azərbaycanın gələcəyini, azadlığını və milli kimliyini qoruyuruq.
Zərdab rayonu, Gəlmə kənd sakini, kənd ağsaqqalı – Abbasov Ələmdar
