“Bizim bir çox üstünlüklərimiz var. Onlardan biri bizim coğrafi vəziyyətimizdir”
Azərbaycan Respublikasının mühüm üstünlüklərindən biri onun əlverişli coğrafi mövqeyidir. Azərbaycan Cənubi Qafqaz regionunda yerləşərək Avropa ilə Asiyanı birləşdirən strateji körpü rolunu oynayır. Ölkə şimalda Rusiya Federasiyası, cənubda İran İslam Respublikası, qərbdə Gürcüstan və Ermənistan, həmçinin Türkiyə ilə həmsərhəddir. Şərqdən isə Xəzər dənizi ilə əhatə olunur. Bu mövqe Azərbaycanı regionun nəqliyyat, enerji və ticarət qovşaqlarından birinə çevirmişdir. Azərbaycanın coğrafi mövqeyi beynəlxalq nəqliyyat dəhlizlərinin üzərində yerləşməsi ilə xüsusi əhəmiyyət kəsb edir. Xüsusilə Şimal–Cənub Beynəlxalq Nəqliyyat Dəhlizi Hindistan və İranı Rusiya və Şimali Avropa ilə birləşdirən strateji marşrutdur və bu dəhliz üzərində Azərbaycan əsas tranzit ölkədir. Eyni zamanda Orta Dəhliz (Trans-Xəzər Beynəlxalq Nəqliyyat Marşrutu) Çin və Mərkəzi Asiyadan Avropaya uzanan alternativ ticarət yoludur. Bu marşrut üzərində yerləşən Azərbaycan yüklərin Xəzər dənizi vasitəsilə daşınmasında mühüm rol oynayır. Coğrafi üstünlüklər nəqliyyat infrastrukturu ilə daha da möhkəmləndirilmişdir. 2017-ci ildə istifadəyə verilmiş Bakı–Tbilisi–Qars dəmir yolu xətti Azərbaycanı birbaşa Türkiyə və Avropa dəmir yolu şəbəkəsinə bağlamışdır. Bu xəttin illik yükdaşıma potensialı mərhələli şəkildə milyonlarla ton yükə çatdırılması nəzərdə tutulmuşdur. Bundan başqa, Ələt Beynəlxalq Dəniz Ticarət Limanı Xəzər hövzəsində ən böyük liman komplekslərindən biridir və illik 15 milyon ton yük və 100 minlərlə konteyner qəbul etmə gücünə malikdir. Azərbaycanın coğrafi mövqeyi enerji təhlükəsizliyi baxımından da strateji əhəmiyyət daşıyır. Xəzər dənizinin zəngin karbohidrogen ehtiyatlarına malik olması və ölkənin bu ehtiyatların Qərb bazarlarına çıxış nöqtəsində yerləşməsi onu mühüm enerji ixracatçısına çevirmişdir. Bu baxımdan Azərbaycan həm region ölkələri, həm də Avropa üçün etibarlı tərəfdaş kimi tanınır. Bundan əlavə, ölkənin müxtəlif iqlim qurşaqlarını əhatə etməsi kənd təsərrüfatının inkişafına əlverişli şərait yaradır. Dünyada mövcud olan 11 iqlim tipindən 9-un Azərbaycanda müşahidə olunması faktı aqrar sahədə geniş məhsul çeşidinin yetişdirilməsinə imkan verir. Bu isə həm daxili bazarın təminatına, həm də ixrac potensialının artmasına səbəb olur. Azərbaycanın coğrafi mövqeyi təkcə xəritə üzərində yerləşmə deyil, həm də iqtisadi, siyasi və strateji üstünlük deməkdir. Qitələri birləşdirən nəqliyyat yolları, enerji marşrutları, zəngin təbii resurslar və əlverişli iqlim şəraiti ölkənin davamlı inkişafına və beynəlxalq mövqeyinin güclənməsinə xidmət edən əsas amillərdəndir. Bu baxımdan coğrafi vəziyyət Azərbaycanın milli üstünlüklərindən biri kimi xüsusi əhəmiyyət daşıyır.
- Zərdabi adına Əlvənd kənd tam orta məktəbin direktoru E.Xəlilov
