Azərbaycan Respublikasının Prezidenti İlham Əliyevin fevralın 15-də Serbiya Respublikasına rəsmi səfəri zamanı verdiyi bəyanat iki ölkə arasında mövcud olan dostluq münasibətlərinin, strateji tərəfdaşlığın və qarşılıqlı etimadın yüksək səviyyədə olduğunu bir daha nümayiş etdirmişdir. Bu səfər təkcə diplomatik xarakter daşımır, eyni zamanda siyasi, iqtisadi və enerji təhlükəsizliyi baxımından mühüm strateji əhəmiyyətə malikdir. Prezident İlham Əliyev bəyanatında Azərbaycan ilə Serbiya arasında uzun illər formalaşmış səmimi münasibətləri xüsusi vurğulamış, ölkə rəhbərləri arasında qarşılıqlı hörmət və dostluğun mövcud olduğunu bildirmişdir. Onun sözlərinə görə, iki ölkə rəhbərləri bir-birini yaxından tanıyır, açıq və səmimi dialoq aparır və dövlət maraqlarını hər zaman ön planda saxlayırlar. Prezident İlham Əliyev çıxışında Serbiya xalqının tarix boyu dövlət suverenliyinin qorunması uğrunda göstərdiyi səyləri yüksək qiymətləndirmişdir. O qeyd etmişdir ki, Serbiya xalqı bütün dövrlərdə dövlət müstəqilliyini və suverenliyini qorumaq üçün böyük qurbanlar vermişdir. Bu fikirlər iki xalq arasında ortaq dəyərlərin – dövlətçilik, müstəqillik və milli maraqların qorunması kimi prinsiplərin mövcudluğunu göstərir. Prezident Aleksandar Vuçiçin rəhbərliyi ilə Serbiyanın beynəlxalq müstəvidə nüfuzunun artması xüsusi qeyd edilmişdir. Azərbaycan tərəfi Serbiyada həyata keçirilən iqtisadi və sosial islahatları yüksək qiymətləndirərək, ölkənin təbii sərvətlərə malik olmamasına baxmayaraq öz gücünə arxalanaraq inkişaf etməsini nümunəvi model kimi təqdim etmişdir. Səfər çərçivəsində Serbiya–Azərbaycan Strateji Şurasının birinci iclası keçirilmişdir. Bu iclas iki ölkə arasında əməkdaşlığın institusional əsaslarının daha da möhkəmləndirilməsi baxımından mühüm hadisədir. Prezident İlham Əliyev vurğulamışdır ki, gələcək üçün açıq-aydın və konkret planlar mövcuddur. Bu planlar aşağıdakı istiqamətləri əhatə edir: – Siyasi dialoqun daha da genişləndirilməsi;
– Beynəlxalq təşkilatlar çərçivəsində qarşılıqlı dəstəyin davam etdirilməsi; – Ərazi bütövlüyü və suverenlik prinsiplərinin müdafiəsi; – Birgə sərmayə layihələrinin həyata keçirilməsi; – Energetika və nəqliyyat sahəsində əməkdaşlığın genişləndirilməsi.
Bu istiqamətlər göstərir ki, Azərbaycan və Serbiya münasibətləri sadəcə dostluq deyil,
eyni zamanda strateji tərəfdaşlıq səviyyəsinə yüksəlmişdir. Prezident İlham Əliyev bəyanatında Azərbaycanın Serbiyaya böyük həcmdə sərmayə qoymağa hazır olduğunu bildirmişdir. Bu, iki ölkə arasında iqtisadi etimadın və investisiya mühitinin müsbət qiymətləndirilməsinin göstəricisidir. Elektrik stansiyasının birgə inşası məsələsi xüsusi vurğulanmışdır. Bu layihə Serbiyanın enerji təhlükəsizliyinin möhkəmləndirilməsinə, enerji istehsal gücünün artırılmasına və iqtisadi sabitliyinə xidmət edəcəkdir. Enerji təhlükəsizliyi müasir dövrdə dövlət müstəqilliyinin əsas sütunlarından biridir. Azərbaycan artıq Serbiyaya təbii qaz ixracına başlamışdır. Bununla yanaşı, ixrac həcminin artırılması barədə qərar qəbul edilmişdir. Bu isə iki ölkə arasında enerji əməkdaşlığının uzunmüddətli xarakter daşıdığını göstərir. Azərbaycanın energetika sahəsində ixrac potensialı hazırda 2 giqavata bərabərdir. 2032-ci ilə qədər əlavə 8 giqavat enerji gücünün yaradılması planlaşdırılır. Bu artım əsasən bərpaolunan enerji mənbələri hesabına təmin ediləcəkdir. Bu siyasət Azərbaycanın yaşıl enerji strategiyasına uyğun olaraq həyata keçirilir və Avropa məkanına enerji ixracının genişləndirilməsini nəzərdə tutur. Serbiya ilə əməkdaşlıq da bu kontekstdə xüsusi əhəmiyyət daşıyır.
Əlvənd kənd tam orta məktəbinin direktoru E. Xəlilov
