Azərbaycan–Serbiya siyasi dialoqunun yeni mərhələsi və strateji tərəfdaşlığın möhkəmlənməsi
Prezident cənab İlham Əliyevin fevralın 15-də Serbiya Respublikasına rəsmi səfəri və səfər çərçivəsində verdiyi bəyanatlar Azərbaycan Respublikası ilə Serbiya arasında münasibətlərin keyfiyyətcə yeni mərhələyə qədəm qoyduğunu bir daha nümayiş etdirdi. Dövlət başçısının çıxışında səsləndirilən fikirlər iki ölkə arasında uzun illər ərzində formalaşmış etibarlı siyasi dialoqun, qarşılıqlı dəstəyə əsaslanan prinsipial mövqenin və gələcəyə hesablanmış strateji planların aydın konturlarını ortaya qoydu.
Prezidentin “bizim təmaslarımız uzun illərdir ki, davam edir” fikri Azərbaycan–Serbiya münasibətlərinin təsadüfi xarakter daşımadığını, əksinə, sistemli və ardıcıl siyasi xətt üzərində qurulduğunu göstərir. Bakı ilə Belqrad arasında əlaqələr qarşılıqlı hörmət, dövlət suverenliyinə və ərazi bütövlüyünə birmənalı dəstək prinsiplərinə əsaslanır. Bu prinsipial yanaşma iki ölkə arasında yüksək etimad mühitinin formalaşmasına səbəb olmuşdur.
Serbiya xalqının dövlət suverenliyinin qorunması istiqamətində göstərdiyi səylərə verilən yüksək qiymət və Serbiya Prezidenti Aleksandar Vuçiçin liderlik keyfiyyətlərinin xüsusi vurğulanması iki dövlətin oxşar dövlətçilik fəlsəfəsini bölüşdüyünü təsdiqləyir. Həm Azərbaycan, həm də Serbiya mürəkkəb geosiyasi şəraitdə milli maraqları prioritet hesab edərək müstəqil və balanslaşdırılmış xarici siyasət yürüdürlər. Beynəlxalq platformalarda, xüsusilə suverenlik və ərazi bütövlüyü məsələlərində ortaq mövqe nümayiş etdirmələri strateji tərəfdaşlığın əsas sütunlarından biridir.
Serbiya–Azərbaycan Strateji Şurasının birinci iclasının keçirilməsi əməkdaşlığın institusional mexanizmlərinin gücləndirilməsi baxımından mühüm əhəmiyyət daşıyır. Bu mexanizm münasibətlərin yalnız siyasi bəyanatlarla məhdudlaşmadığını, konkret fəaliyyət planları və yol xəritələri əsasında inkişaf etdiyini göstərir. Prezident İlham Əliyevin qeyd etdiyi kimi, gələcək üçün “açıq-aydın planlar” mövcuddur və bu planlar siyasi dialoqun dərinləşdirilməsini, iqtisadi və investisiya əməkdaşlığının genişləndirilməsini, energetika və nəqliyyat sahəsində sinerjinin gücləndirilməsini əhatə edir.
Xüsusilə nəqliyyat və logistika imkanlarının genişləndirilməsi regional əməkdaşlıq baxımından strateji əhəmiyyət daşıyır. Azərbaycan Cənubi Qafqaz regionunda mühüm tranzit və enerji qovşağına çevrildiyi bir dövrdə, Serbiya da Balkan məkanında logistika və nəqliyyat mərkəzi rolunu gücləndirir. Bu baxımdan Bakı ilə Belqrad arasında yaranan sinerji daha geniş Avrasiya məkanında yeni əməkdaşlıq formatlarının formalaşmasına zəmin yaradır. Prezident İlham Əliyevin Serbiyaya rəsmi səfəri siyasi etimadın daha da möhkəmləndirilməsi, strateji tərəfdaşlığın dərinləşdirilməsi və uzunmüddətli əməkdaşlıq perspektivlərinin müəyyənləşdirilməsi baxımından mühüm mərhələ kimi qiymətləndirilə bilər.
Cavid Nuriyev – Zərdab şəhər sakini, fəal gənc
