ABŞ beş ildən çoxdur ki, 1,145 trilyon yen (təxminən 7,6 milyard dollar) dəyərində 118 müqavilə üzrə Yaponiyaya silah və hərbi texnika çatdırılmasını gecikdirir.
Xeberaz.info xəbər verir ki, məlumatı Yaponiyanın aparıcı iqtisadi qəzeti Nikkei hökumətin audit agentliyinin rəsmi sənədlərinə istinadən yayıb. Bildirilir ki, gecikmə Amerika istehsalçıları ilə bağlı problemlərlə əlaqədardır.
Agentlik Yaponiya Müdafiə Nazirliyindən bu məsələləri ABŞ hakimiyyəti ilə daha fəal şəkildə həll etməsini istəyib.
Yaponiya tərəfi xüsusilə 2019 və 2020-ci illərdə gəlməli olan E-2D erkən monitorinq və xəbərdarlıq təyyarələri üçün avadanlıq alınmasını nəzərdə tutan dörd müqavilədən narahatdır. Gecikmə səbəbindən Hərbi Hava Qüvvələrinin köhnə təyyarələrin avadanlıqlarından istifadə etmək məcburiyyətində qaldığı bildirilir.
Müqavilələrin yerinə yetirilməsindəki çətinliklər, xüsusən də ABŞ anbarlarında lazımi avadanlıq və silahların olmaması ilə əlaqədardır. Nikkei-nin məlumatına görə, raketdən müdafiə sistemi üçün Patriot PAC-3 raketləri ilə bağlı problemlər var. ABŞ onları Amerika lisenziyası ilə istehsal edildiyi Yaponiyadan almağa başlayıb.
