Azərbaycanda yenilənəbilən enerji sahəsində yeni bir mərhələ rəsmən başlayır.
Bu gün “Gülüstan” sarayında təşkil olunan rəsmi açılış mərasimində Prezident İlham Əliyev 240 meqavat gücündə “Xızı-Abşeron” Külək Elektrik Stansiyasının istismara verilməsini elan etdi. Bu layihə ölkəmizin enerji siyasətində strateji dönüşün mühüm simvolu olmaqla yanaşı, yerli və beynəlxalq tərəfdaşlığın uğurlu nəticəsidir.
Prezident çıxışına ölkəmizin həyatında bu günün xüsusi əhəmiyyət daşıdığını vurğulayaraq başladı və tədbir iştirakçılarını səmimi salamladı. O, “Xızı-Abşeron” Külək Elektrik Stansiyasının ölkənin enerji potensialını daha da gücləndirəcəyini qeyd etdi və bu layihənin Azərbaycan üçün mühüm nailiyyət olduğunu bildirdi.
Prezident İlham Əliyev çıxışında ötən illərdə ölkəmizin enerji sisteminin gücləndirilməsi istiqamətində görülən işlərə toxundu, son 20 ildə yaradılan generasiya gücünün üç dəfədən çox artdığını və bu gün ölkənin ümumi generasiya gücünün təqribən 10 000 meqavata çatdığını xüsusi vurğuladı. O, bu göstəricinin tarixi rekord olduğunu və gələcəkdə əlavə bərpaolunan enerji mənbələrinin yaradılması ilə daha da artacağını bildirdi.
Prezident qeyd etdi ki, 2022-ci ilin yanvarında məhz bu zalda layihənin təməli qoyulmuşdu və bu dördillik mərhələnin uğurla başa çatması ölkəmizin enerji transformasiyası strategiyasının real təzahürüdür. Layihənin reallaşmasında Səudiyyə Ərəbistanının “ACWA Power” şirkətinin və digər beynəlxalq tərəfdaşların rolu xüsusi qeyd olundu.
Çıxışında Dövlət başçısı gələcək planlara da toxundu və Azərbaycanın 2030-cu ilədək bərpaolunan enerji sahəsində daha da böyük hədəflər qoyduğunu bildirdi. Prezident İlham Əliyev qeyd etdi ki, planlaşdırılan layihələr çərçivəsində 2030-cu ilədək külək və günəş enerjisi sahəsində təxminən 6 GW, 2032-ci ilədək isə 8 GW gücündə yeni generasiya qüvvələri yaradılacaq. Enerji sektorunda yeni strategiyaların tətbiqi ilə yanaşı, Prezident bu sahədə investisiya mühitinin daha da cəlbedici olması məsələsinə də diqqət ayırdı. O, birinci dəfə ölkədə yaradılan Batareya Enerji Saxlama Sistemləri layihəsi barədə danışaraq, yerli və xarici investorları bu sahəyə dəvət etdi.
Çıxışının sonunda Prezident İlham Əliyev “Xızı-Abşeron” Külək Elektrik Stansiyasının Azərbaycan üçün təkcə enerji təchizatını deyil, həm də iqtisadi və sosial inkişafı dəstəkləyən strateji layihə olduğunu vurğuladı və bu tarixi gün münasibətilə bütün vətəndaşları təbrik etdi.
Abdulbağı Fazilli – Zərdab şəhər sakini, fəal gənc
