Azərbaycan gənclərinin forumları
Azərbaycan Respublikasında gənclər siyasətinin mühüm istiqamətlərindən biri gənclərin ictimai-siyasi proseslərdə fəal iştirakının təmin olunmasıdır. Bu baxımdan Azərbaycan gənclərinin forumları dövlət və gənclər arasında dialoqun qurulması, gənclərin təşəbbüs və problemlərinin diqqət mərkəzinə çatdırılması baxımından xüsusi əhəmiyyət daşıyır.
1996-cı il 2 fevral tarixində Ulu Öndər Heydər Əliyevin təşəbbüsü ilə keçirilmiş I Azərbaycan Gənclər Forumu ölkədə gənclər hərəkatının inkişafında dönüş nöqtəsi olmuşdur. Forum gənclərin cəmiyyətin inkişafında aparıcı qüvvə kimi tanınmasına, onların dövlət idarəçiliyində rolunun artırılmasına zəmin yaratmışdır. Məhz bu forumun nəticəsi olaraq Azərbaycanda gənclər siyasəti sistemli və məqsədyönlü şəkildə formalaşmağa başlamışdır.
Sonrakı illərdə keçirilən Azərbaycan gənclərinin forumları gənclərin təhsil, məşğulluq, sosial müdafiə, idman, mədəniyyət və vətənpərvərlik istiqamətində fikir və təkliflərinin müzakirə olunduğu əsas platformaya çevrilmişdir. Forumlarda qəbul olunan qərar və tövsiyələr gənclərlə bağlı dövlət proqramlarının hazırlanmasına və həyata keçirilməsinə mühüm töhfə vermişdir.
Azərbaycan gənclərinin forumları həmçinin region gənclərinin fəallığının artırılması, könüllülük hərəkatının genişləndirilməsi və gənclər təşkilatlarının fəaliyyətinin gücləndirilməsi baxımından əhəmiyyətlidir. Bu tədbirlər gənclərin liderlik bacarıqlarının inkişafına, ictimai məsuliyyət hissinin formalaşmasına və vətəndaş cəmiyyətinin möhkəmlənməsinə xidmət edir.
Bu gün Azərbaycan gənclərinin forumları Ulu Öndər Heydər Əliyevin müəyyən etdiyi gənclər siyasətinin uğurla davam etdirilməsinin bariz nümunəsidir. Forumlar gənclərin səsinin eşidildiyi, ideyalarının dəstəkləndiyi və gələcəyə yönəlik strateji baxışların formalaşdığı mühüm ictimai platforma kimi öz aktuallığını qoruyur.
Şamil Babayev – Zərdab Gənclər evi, dərnək rəhbəri
