xeberaz.info
NATO baş katibi Tayvan üzərində müharibədən narahatdır.
xeberaz.info-nun məlumatına görə Çinin dövlət qəzeti Global Times yazır ki, NATO-nun baş katibi Yens Stoltenberqin Münhen konfransında Asiya regionu ilə bağlı bəyanatı alyansın Tayvan üzərində mümkün müharibə ilə bağlı narahatlığını göstərə bilər.
Stoltenberq deyib ki, “bu gün Avropada baş verənlər sabah Asiyada baş verə bilər”. NATO baş katibinin bu sözləri bir çoxları tərəfindən “Tayvan adasındakı müharibə ilə bağlı narahatlıq” kimi qəbul edilib.
Çinli hərbi ekspert Sonq Çjonpinq nəşrə müsahibəsində qeyd edib ki, ABŞ NATO-nun dünyada mövcudluğunu genişləndirməklə yeni təsir səviyyəsinə çata biləcəyinə ümid edir. ABŞ-ın məqsədi NATO və Avropaya nəzarət etmək və NATO-nu qlobal hərbi ittifaqa çevirməkdir. Stoltenberqin sözləri NATO-nun Asiya-Sakit okean məsələlərinə qarışmasına zəmin hazırlayan kimi qiymətləndirilə bilər.
Tayvan ətrafında vəziyyət ötən il avqustun əvvəlində ABŞ Konqresinin Nümayəndələr Palatasının o zamankı sədri Nensi Pelosinin adaya səfərindən sonra xeyli gərginləşib. Adanı özünün əyalətlərindən biri hesab edən Çin bu addımında ABŞ-ın Tayvan separatizmini dəstəklədiyini görərək Pelosinin səfərini pisləyib və genişmiqyaslı hərbi təlimlər keçirib.
ÇXR mərkəzi hökuməti ilə onun ada əyaləti arasında rəsmi əlaqələr 1949-cu ildə Çin Kommunist Partiyası ilə vətəndaş müharibəsində məğlub olan Çan Kay-şekin başçılıq etdiyi Kuomintang qüvvələri Tayvana köçdükdən sonra kəsilib.
Ada ilə materik Çin arasında işgüzar və qeyri-rəsmi əlaqələr 1980-ci illərin sonlarında bərpa olunub. 1990-cı illərin əvvəllərindən etibarən tərəflər qeyri-hökumət təşkilatları – Tayvan Boğazı boyunca Əlaqələrin İnkişafı üzrə Pekin Assosiasiyası və Boğazlararası Mübadilələr üzrə Taypey Fondu vasitəsilə əlaqə saxlamağa başlayıblar.