23.04.2023/ 14: 16/ Türkiyənin hakim partiyasının ofisləri naməlum şəxslər tərəfindən atəşə tutulur

İstanbulda naməlum şəxslər hakim Ədalət və İnkişaf Partiyasının ofisini atəşə tutub.

xeberaz.info Rusiya KIV-lərinə istinadən xəbər verir ki, İstanbulda iki naməlum şəxs ölkənin hakim partiyası Ədalət və İnkişaf Partiyasının ofisinin yerləşdiyi binaya atəş açıb. Bazar günü, aprelin 23-də bu barədə Türkiyənin Daily Sabah nəşri xəbər verir.

Qeyd olunur ki, gecə saatlarında iki nəfər hakim partiyanın Bahçelievler Küçəsi rayonunda yerləşən seçki əlaqə bürosuna atəş açıb. Ümumilikdə, təxminən beş atəş açılıb.

Hadisə nəticəsində xəsarət alan olmayıb. Lakin binanın yuxarı mərtəbəsində güllə dəlikləri aşkar edilib. Hazırda polis şübhəliləri axtarır.

TASS xəbər verir ki, bundan əvvəl aprelin 20-də naməlum şəxs Türkiyənin hakim partiyasının ölkənin cənubunda yerləşən Adana şəhərindəki ofisinə atəş açıb. Daha sonra naməlum şəxs partiyanın boş ofisinə nasoslu ov tüfəngindən 12 atəş açıb. Bir müddət sonra onu həbs ediblər.