Azərbaycanın dövlətçilik ənənələrinin yenidən bərpası, möhkəmləndirilməsi və müasir çağırışlara uyğun inkişaf etdirilməsi Ümummilli Lider Heydər Əliyevin tarixi xidmətlərindən biridir. Onun yaratdığı siyasi məktəb, dövlət idarəçilik modeli və strateji inkişaf xətti bu gün də ölkəmizin milli inkişaf yolunun əsas təməlini təşkil edir. Bu böyük irsin ən layiqli davamçısı isə xalqın etimadı ilə Prezident seçilmiş İlham Əliyevdir. Xüsusilə 2005-ci il 26 mart tarixində Yeni Azərbaycan Partiyasının III qurultayında İlham Əliyevin partiya sədri seçilməsi, onun siyasi fəaliyyətində yeni mərhələnin başlanğıcı olmaqla yanaşı, Ulu Öndərin müəyyən etdiyi siyasi xəttin davamlılığının təsdiqi kimi tarixə düşmüşdür.
Ulu Öndər Heydər Əliyevin siyasi irsi yalnız idarəçilik təcrübəsi deyil, həm də milli dövlətçilik fəlsəfəsidir. Bu irs Azərbaycançılıq ideyasına, dövlət suverenliyinin qorunmasına, xalqın rifahına, güclü orduya və balanslaşdırılmış xarici siyasətə əsaslanırdı. Ulu Öndər ölkənin bütün sahələrini – iqtisadiyyatı, siyasəti, təhlükəsizliyi, mədəniyyəti və sosial həyatı – vahid inkişaf sisteminə uyğunlaşdırmışdı. Onun müəyyən etdiyi yolun mərkəzində güclü dövlət və xalq birliyi dayanırdı. Bu birlik Azərbaycanın gələcək inkişafını təmin edən ən möhkəm dayağa çevrildi. Məhz belə möhkəm təməllər İlham Əliyevin sonrakı illərdə ölkəni uğurla idarə etməsinə geniş imkan yaratdı.
Yeni Azərbaycan Partiyasının 2005-ci il 26 mart tarixində keçirilmiş III qurultayı həm siyasi, həm də ideoloji baxımdan mühüm hadisə idi. Qurultayda İlham Əliyev yekdilliklə partiyanın sədri seçildi. Bu, təsadüfi deyildi. Çünki o zamana qədər İlham Əliyev həm Prezident, həm də YAP-ın aparıcı siyasi simalarından biri kimi dövlətin inkişafına ciddi töhfələr verirdi. Sədr seçilməsi yalnız təşkilati dəyişiklik deyil, həm də Heydər Əliyev xəttinin davam etdirilməsi baxımından strateji qərar idi. Partiyanın əsas ideologiyası – dövlətçilik, milli maraqların qorunması, sabitlik və inkişaf – İlham Əliyevin rəhbərliyi ilə daha da möhkəmləndi.
Qurultaydan sonra YAP-ın fəaliyyəti yeni dinamika qazandı, partiya dövlət idarəçiliyi ilə daha sıx inteqrasiya olundu, siyasi sistemin müasirləşməsi istiqamətində vacib addımlar atıldı.
İlham Əliyev Ulu Öndərin müəyyən etdiyi strateji inkişaf kursunu qorumaqla yanaşı, onu yeni dövrün çağırışlarına uyğun modernləşdirmişdir. Onun hakimiyyəti dövründə Azərbaycan hərtərəfli inkişaf mərhələsinə qədəm qoymuşdur:
Prezident cənab İlham Əliyevin rəhbərliyi ilə Azərbaycan iqtisadiyyatı sabit şəkildə inkişaf etmiş, neft strategiyası uğurla davam etdirilmişdir. Ölkə enerji layihələri – Bakı-Tbilisi-Ceyhan, Cənub Qaz Dəhlizi, TANAP kimi nəhəng layihələrin əsas iştirakçı ölkəsinə çevrilmişdir. Bu isə Azərbaycanın iqtisadi və siyasi nüfuzunu artırmışdır.
Ulu Öndərin əsas prioritetlərindən biri ordu quruculuğu idi. İlham Əliyev isə bu siyasəti müvəffəqiyyətlə davam etdirərək Azərbaycan Ordusunu regionun ən güclü hərbi qüvvələrindən birinə çevirib. 2020-ci ildə Vətən müharibəsində qazanılan Zəfər bu siyasətin məntiqi nəticəsi idi.
Prezident cənab İlham Əliyevin apardığı xarici siyasət Azərbaycanı qlobal arenada etibarlı tərəfdaşa çevirib. Müstəqil siyasət xətti ölkəmizin suverenliyinin və milli maraqlarının qətiyyətlə müdafiəsini təmin edir.
Ölkədə geniş sosial islahatlar həyata keçirilmiş, əməkhaqqıları və pensiyalar artırılmış, yüz minlərlə vətəndaşın sosial müdafiəsi gücləndirilmişdir.
Bu varislik modeli təkcə formal siyasi ardıcıllıq deyil. Onun mahiyyəti dövlət idarəçiliyi fəlsəfəsinin bütöv şəkildə qorunması və zamanın tələblərinə uyğun yenilənməsidir. İlham Əliyev Heydər Əliyevin yaratdığı dövlətçilik ənənəsini müasir texnoloji inkişaf, innovasiyalar, rəqəmsallaşma və yeni iqtisadi modellərlə zənginləşdirib.
Ulu Öndər Heydər Əliyevin yaratdığı siyasi irs Azərbaycan dövlətçiliyinin sütunudur. Bu irsin əsl sahibkarı və layiqli davamçısı Prezident cənab İlham Əliyev ölkəmizi müasir, qüdrətli və nüfuzlu dövlətə çevirməklə Heydər Əliyev siyasətinə sədaqətini əməli işlərlə sübut etmişdir.
2005-ci ildə Yeni Azərbaycan Partiyasının III qurultayında İlham Əliyevin partiya sədri seçilməsi Azərbaycan siyasi tarixində dönüş nöqtəsi olmuş, dövlətin uzunmüddətli və sabit inkişafının təminatına çevrilmişdir.
Bu gün Azərbaycan dünya arenasında güclü, söz sahibi olan, qalib ölkə kimi tanınırsa, bu, Heydər Əliyev–İlham Əliyev siyasi xəttinin sarsılmazlığının parlaq göstəricisidir.
Zərdab rayon Həsən bəy Zərdabi muzeyinin direktoru Vəfa Bayramova
