Təhlükəsizlik təmin edilmədən inkişaf mümkün deyil
Türk dünyasının birliyinin, həmrəyliyinin təqdimatı olan Türk Dövlətləri Təşkilatı Dövlət Başçılarının XII Zirvə görüşü tarixi əhəmiyyət daşımaqla hazırkı geosiyasi çağırışlar fonunda TDT-nin sülhün və sabitliyin təmin olunmasında birgə səylər göstərmək niyyətini nümayiş etdirir. Azərbaycanın xarici siyasəti türk dövlətləri ilə əlaqələrin dərinləşdirilməsini prioritetləşdirir.
Təhlükəsizlik təmin edilmədən inkişaf mümkün deyil. Müasir dünyada dövlətlərin sabitliyi, iqtisadi inkişafı və sosial rifahı birbaşa olaraq təhlükəsizliklə sıx bağlıdır. Qlobal miqyasda artan gərginlik, silahlı münaqişələr, terrorizm, separatizm və kiberhücumlar fonunda hər bir dövlət öz milli təhlükəsizlik sistemini gücləndirməyə, həmçinin beynəlxalq tərəfdaşlarla birgə müdafiə mexanizmləri yaratmağa çalışır. Bu baxımdan Türk Dövlətləri Təşkilatının çərçivəsində hərbi və təhlükəsizlik sahəsində əməkdaşlığın geniçləndirilməsi mühüm strateji əhəmiyyət kəsb edir. Beynəlxalq hüququn norma və prinsiplərinin kobud şəkildə pozulduğu, yeni geosiyasi toqquşmaların və münaqişələrin meydana gəldiyi dövrdə ölkələrimiz arasında hərbi və hərbi-texniki sahədə əməkdaşlığın inkişafı son dərəcə vacib amildir. Türk dövlətləri ortaq tarix, mədəniyyət və dəyərlərlə yanaşı, eyni zamanda ortaq təhlükəsizlik maraqlarını da paylaşırlar. Bu baxımdan, təhlükəsizlik məsələlərində koordinasiyanın artırılması regional sabitlik üçün mühüm zəmin yaradır. Türk Dövlətləri Təşkilatı çərçivəsində hərbi və təhlükəsizlik əməkdaşlığının genişləndirilməsi, qarşılıqlı müdafiə qabiliyyətinin artırılması və birgə təlimlərin keçirilməsi regionda sülhün və sabitliyin təmin olunmasına mühüm töhfə verir. Türk dövlətlərinin birliyi yalnız mədəni və iqtisadi sahələrdə deyil, həmdə müdafiə və təhlükəsizlik istiqamətində güclü strateji əməkdaşlığa əsaslanır. Bu birliyin möhkəmlənməsi Türk dünyasının qlobal miqyasda vahid güc kimi formalaşmasına və beynəlxalq təhlükəsizlik sistemində öz layiqli yerini tutmasına imkan yaradacaqdır.
Zərdab Rayon Heydər Əliyev Mərkəzinin əməkdaşı Xanım İmanova
