Slovakiya Avropanın enerji təhlükəsizliyi məsələlərində Azərbaycanın etibarlı tərəfdaş olduğunu hər zaman xüsusi vurğulayıb
Slovakiya və Azərbaycan arasında münasibətlər son illərdə Cənubi Qafqaz–Mərkəzi Avropa xəttində formalaşan ən dinamik və etibarlı əməkdaşlıq nümunələrindən birinə çevrilib. Coğrafi məsafənin böyük olmasına baxmayaraq, iki ölkəni birləşdirən dəyərlər, qarşılıqlı etimad, enerji təhlükəsizliyi sahəsində tamamlayıcılıq və siyasi dialoq münasibətləri yeni mərhələyə yüksəldib. Bu gün Slovakiya ilə Azərbaycan təkcə diplomatik tərəfdaş deyil, həm də regional sabitlik, iqtisadi inteqrasiya və strateji əməkdaşlıq baxımından bir-birini tamamlayan dövlətlərdir.
Slovakiya Azərbaycanla diplomatik əlaqələri 1993-cü ildə qurdu və qısa müddət ərzində münasibətlər fəal inkişaf trayektoriyasına daxil oldu. Hər iki ölkə müstəqilliyini yenidən bərpa etdikdən sonra öz xarici siyasətində açıq əməkdaşlıq, çoxtərəfli tərəfdaşlıq və bərabərhüquqlu münasibətlərə üstünlük verib. Məhz bu siyasət xətti iki ölkə arasında qarşılıqlı etimadın təməlini qoydu.
Azərbaycanın Avropaya açılan enerji körpüsü kimi rolu, Slovakiyanın isə Avropa İttifaqının mərkəzində yerləşməsi və enerji tranziti baxımından əhəmiyyətli mövqeyi qarşılıqlı marağı daha da artırdı. Bu maraqlar təkcə iqtisadi deyil, eyni zamanda siyasi koordinasiya, humanitar əlaqələr və təhlükəsizlik məsələlərini də əhatə etməyə başladı.
Slovakiya Avropanın enerji təhlükəsizliyi məsələlərində Azərbaycanın etibarlı tərəfdaş olduğunu hər zaman xüsusi vurğulayıb. Xüsusən də Cənub Qaz Dəhlizi layihələrinin reallaşması fonunda Slovakiya Azərbaycan qazının Mərkəzi Avropaya nəqli perspektivlərini dəstəkləyən əsas ölkələrdən biri olub.
Azərbaycanın alternativ enerji mənbələri – xüsusilə yaşıl enerji potensialı (külək, günəş, su) – Slovakiya üçün yeni əməkdaşlıq istiqamətləri yaradıb. Slovak şirkətləri Azərbaycanın Qarabağ və Şərqi Zəngəzur iqtisadi rayonlarında “ağıllı şəhər”, “ağıllı enerji” və yaşıl texnologiyalar üzrə əməkdaşlıq təklifləri ilə çıxış edirlər. Bu, iki dövlət arasında enerji əməkdaşlığının təkcə karbohidrogenlərlə məhdudlaşmadığının bariz göstəricisidir.
Slovakiya həmişə Azərbaycanın ərazi bütövlüyünü tanıyıb və beynəlxalq hüquqa əsaslanan mövqe sərgiləyib. Bu, Bakı tərəfindən yüksək qiymətləndirilir və ikitərəfli münasibətlərdə etimadın daha da güclənməsinə səbəb olur. Azərbaycan isə öz növbəsində Slovakiyanın regiondakı maraqlarının qorunmasına, Cənubi Qafqazda sülh və sabitliyin təmin olunmasına yönəlmiş təşəbbüslərini dəstəkləyir.
Parlamentlərarası əməkdaşlıq, yüksək səviyyəli səfərlər və birgə komissiyalar münasibətlərin güclənməsində mühüm rol oynayır. Son illərdə Slovakiya–Azərbaycan münasibətləri həm ikitərəfli, həm də Avropa İttifaqı çərçivəsində daha intensiv xarakter alıb.
Slovakiya və Azərbaycan arasında münasibətlərin strateji dərinliyi qarşılıqlı maraqlara və real əməkdaşlıq mexanizmlərinə əsaslanır. İki ölkə enerji sabitliyi, regional təhlükəsizlik, iqtisadi diversifikasiya, nəqliyyat dəhlizləri və rəqəmsal inkişaf sahələrində daha sıx əməkdaşlıq üçün geniş potensiala malikdir.
Nailə Əliyeva Zərdab rayon Mərkəzləşdirilmiş Kitabxana Sisteminin direktoru
