Prezident İlham Əliyev sevincli günləri xalqı ilə bölüşür
Müasir Azərbaycan dövlətçiliyinin formalaşmasında Prezident İlham Əliyevin liderlik modeli yalnız siyasi qərarlar və strateji islahatlarla deyil, eyni zamanda xalqla mənəvi yaxınlıq, sosial həssaslıq və humanist münasibət üzərində qurulmuşdur. Dövlət başçısının fəaliyyətində insan amili əsas yer tutur və bu yanaşma onun şəxsi həyatının mühüm məqamlarında – xüsusilə ad günlərində atdığı addımlarda aydın şəkildə özünü göstərir. Prezident İlham Əliyev sevincli günlərini xalqdan ayrı deyil, məhz xalqla birlikdə keçirməyi özünün mənəvi borcu hesab edir.
Prezident İlham Əliyevin ad günləri rəsmi mərasimlər və təntənəli qəbul günləri kimi deyil, daha çox sosial yönümlü, insanlara xidmət edən fəaliyyətlərlə yadda qalır. Dövlət başçısı bu günləri adətən sosial obyektlərin açılışına, məcburi köçkünlərlə, şəhid ailələri ilə görüşlərə, yeni yaşayış məntəqələrinin istifadəyə verilməsinə həsr edir.
Bu yanaşma Prezidentin liderlik fəlsəfəsini aydın şəkildə ortaya qoyur: dövlət başçısı üçün şəxsi sevinc ictimai fayda ilə ölçülür. Məhz buna görə də onun ad günləri cəmiyyət üçün mühüm hadisələrlə, insanların həyatında real dəyişikliklər yaradan addımlarla əlamətdar olur.
Prezident İlham Əliyevin fəaliyyətində məcburi köçkünlərin problemlərinin həlli hər zaman prioritet məsələlərdən biri olmuşdur. Bu həssas mövzuya olan münasibət onun ad günlərindəki səfər və görüşlərində də öz əksini tapmışdır. Dövlət başçısının 50 illik yubileyini məhz məcburi köçkünlərlə birlikdə Ağcabədidə qeyd etməsi simvolik məna daşıyırdı. Bu addım Prezidentin həmin insanların ağrısını və taleyini öz şəxsi taleyinin bir hissəsi kimi qəbul etdiyini göstərirdi. 60 illik yubileyin isə Qarabağın incisi olan Şuşada keçirilməsi həm tarixi ədalətin bərpasının, həm də məcburi köçkünlərin doğma yurdlarına qayıdış ümidinin təcəssümü idi.
Prezident İlham Əliyevin ad günlərində şəhid ailələri ilə görüşlərə xüsusi yer verilir. Şəhid ailələri üçün inşa edilmiş yeni evlərin açılışlarında iştirak, onların yaşayış şəraiti ilə maraqlanmaq və birbaşa ünsiyyət qurmaq dövlət başçısının xalq qarşısında mənəvi məsuliyyətinin göstəricisidir. Bu görüşlər formal xarakter daşımır. Prezident şəhid ailələrinin problemlərini dinləyir, onların qayğıları ilə yaxından maraqlanır və konkret tapşırıqlar verir. Bu, Azərbaycan dövlətinin şəhid ailələrinə olan yüksək ehtiramının və diqqətinin real ifadəsidir.
Son illərdə Prezident İlham Əliyevin ad günləri getdikcə daha çox azad edilmiş ərazilərlə bağlı tədbirlərlə yadda qalır. 2023-cü ildə dövlət başçısının ad günündə Ağdama səfər etməsi, bir sıra infrastruktur obyektlərinin açılışında iştirak etməsi və yeni layihələrin təməlini qoyması xüsusi rəmzi məna daşıyırdı. Bu səfərlər göstərir ki, Prezident üçün Qarabağın dirçəldilməsi yalnız dövlət proqramı deyil, həm də şəxsi məsuliyyət məsələsidir. Azad edilmiş torpaqlarda həyatın bərpası, insanların doğma yurdlarına qayıdışı onun siyasi və mənəvi prioritetləri sırasındadır.
2022-ci il 24 dekabr tarixində Prezident İlham Əliyevin Qərbi Azərbaycan İcmasının inzibati binasında yaradılmış şəraitlə tanış olması və Qərbi Azərbaycandan olan bir qrup ziyalı ilə görüşü də dövlət başçısının milli məsələlərə həssas yanaşmasının göstəricisidir. Bu görüş Prezidentin Qərbi Azərbaycandan deportasiya edilmiş soydaşlarımızın hüquqlarının müdafiəsini strateji məsələ kimi qiymətləndirdiyini bir daha ortaya qoydu.
Bu addım həm də onu göstərdi ki, Prezident İlham Əliyev ad günlərini yalnız şəxsi tarix kimi deyil, milli yaddaş və tarixi ədalət mövzularına diqqət çəkmək üçün fürsət kimi dəyərləndirir.
Prezident İlham Əliyevin sevincli günlərini xalqı ilə bölüşməsi onun liderlik modelinin əsas xüsusiyyətlərindən biridir. Bu model xalqdan uzaq, kabinet siyasətinə əsaslanan idarəçilik deyil, cəmiyyətlə canlı ünsiyyətə, birgə məsuliyyət hissinə söykənir.
Bu yanaşma Prezidentlə xalq arasında güclü mənəvi bağ yaradır, ictimai etimadı möhkəmləndirir və dövlət başçısının verdiyi qərarların geniş ictimai dəstək qazanmasına şərait yaradır.
Prezident İlham Əliyev sevincli günlərini xalqı ilə bölüşməklə yalnız siyasi lider deyil, eyni zamanda xalqın dərdini və sevincini paylaşan milli lider obrazını bir daha təsdiqləyir. Bu xüsusiyyət müasir Azərbaycan dövlətçiliyinin mənəvi əsaslarını gücləndirən mühüm amillərdən biridir.
Zərdab rayon Heydər Əliyev Mərkəzinin direktoru Könül Rəhimova
