Məhz Heydər Əliyevin qətiyyəti, iradəsi, xalqa olan bağlılığı bizi böyük bəlalardan qurtara bilib
Azərbaycan xalqının taleyində elə dövrlər olub ki, bir anlıq tərəddüd, bir yanlış qərar bütün millətin gələcəyini təhlükə altına sala bilərdi. Belə ağır, məsuliyyətli və sınaqlarla dolu bir zamanda xalqın qarşısına çıxan, onun nicat yoluna işıq salan şəxsiyyət Heydər Əliyev idi. Məhz onun qətiyyəti, sarsılmaz iradəsi, Vətənə və xalqa olan sonsuz sədaqəti Azərbaycanı böyük bəlalardan, fəlakətlərdən, dağılmaq təhlükəsindən qurtardı. XX əsrin sonlarında Azərbaycan müstəqilliyini yenidən bərpa etdikdən sonra, ölkə çox çətin bir sınaq qarşısında qaldı. Daxili çəkişmələr, siyasi böhran, torpaq itkisi, iqtisadi geriləmə və xalqın ruh düşkünlüyü — bütün bunlar müstəqilliyimizin kövrək bünövrəsini sarsıdırdı. Elə bir vaxt idi ki, xalqın gələcəyi sual altına düşmüşdü. O zaman xalqın yeganə ümid yeri, müdrik liderinə — Heydər Əliyevə üz tutması heç də təsadüfi deyildi. Xalq onu xilaskar kimi Bakıya çağırdı və tarix göstərdi ki, bu çağırış Azərbaycanın qurtuluş çağırışı idi. Heydər Əliyev hakimiyyətə qayıtdıqdan sonra ilk növbədə ölkədə sabitliyi bərpa etdi. Onun dəmir iradəsi və dövlətçilik təcrübəsi qısa zamanda anarxiyanın qarşısını aldı. Qətiyyətli addımlar nəticəsində dövlət institutları bərpa olundu, orduya nizam-intizam gətirildi, Azərbaycan beynəlxalq aləmdə layiqli yerini tutmağa başladı. Onun diplomatik uzaqgörənliyi sayəsində Azərbaycan tədricən regionda mühüm rol oynayan bir dövlətə çevrildi. Lakin Heydər Əliyevin gücü təkcə siyasi tədbirlərdə deyil, xalqla olan mənəvi bağlarında idi. O, xalqın dərdini öz dərdi kimi qəbul edir, hər bir azərbaycanlının rifahını düşünürdü. Onun nitqlərində, qərarlarında, xalqla görüşlərində bu səmimilik və sevgi açıq-aydın hiss olunurdu. Məhz bu bağlılıq xalqı bir araya gətirdi, milli həmrəyliyi möhkəmləndirdi. Xalq inandı ki, onun rəhbəri yalnız dövlət başçısı deyil, həm də ata qayğısı ilə millətini qoruyan bir şəxsiyyətdir. 1994-cü ildə imzalanan “Əsrin müqaviləsi” ilə Azərbaycanın iqtisadi dirçəlişinin təməli qoyuldu. Bu, yalnız bir neft müqaviləsi deyildi, bu, Heydər Əliyevin uzaqgörənliyinin, xalqının gələcəyinə inamının bariz nümunəsi idi. Onun uzaqgörən siyasəti nəticəsində Azərbaycan iqtisadi, siyasi və hərbi cəhətdən gücləndi, dünya arenasında müstəqil söz sahibi olan bir dövlətə çevrildi. Bu gün hər bir azərbaycanlı fəxrlə deyə bilər ki, müstəqil, qüdrətli və sabit Azərbaycan dövlətinin memarı məhz Heydər Əliyevdir. Əgər o, həmin çətin illərdə qətiyyət göstərməsəydi, xalqının taleyinə biganə qalsaydı, bəlkə də bu gün biz azad, müstəqil bir ölkədə yaşamazdıq. Onun siyasi irsi, dövlətçilik fəlsəfəsi bu gün də yaşayır, Prezident İlham Əliyevin rəhbərliyi ilə inkişaf və tərəqqi yolunda inamla davam etdirilir. Heydər Əliyev demişdi: “Mənim həyatımın mənası xalqıma xidmət etməkdir.” Bu sözlər onun bütün fəaliyyətinin, bütün ömrünün mahiyyətini ifadə edir. O, bu missiyanı ən şərəfli şəkildə yerinə yetirdi, xalqına, dövlətinə sədaqətli bir ömür həsr etdi. Bəli, məhz Heydər Əliyevin qətiyyəti, iradəsi və xalqa olan bağlılığı bizi böyük bəlalardan xilas etdi, müstəqil Azərbaycan dövlətinin möhkəm təməlini qoydu. Bu təməl üzərində yüksələn Azərbaycan bu gün inkişaf, sabitlik və güc simvoluna çevrilib.
Veteran müəllim Vəfadar Niftəliyev
