Enerji sahəsində əməkdaşlığımızın digər istiqaməti bərpaolunan enerji ilə bağlıdır və onun böyük potensialı var.
Son illərdə dünyada enerji siyasətində mühüm dəyişikliklər baş verir. Ənənəvi enerji resursları ilə yanaşı, bərpaolunan enerji mənbələrinin inkişafı dövlətlərin strateji gündəliyində xüsusi yer tutur. Bu baxımdan Azərbaycan ilə Avropa İttifaqı arasında enerji sahəsində əməkdaşlığın yeni istiqamətləri formalaşır və tərəflər bu sahədə geniş perspektivlər görür. 2026-cı il martın 11-də Avropa İttifaqı Şurasının Prezidenti Antonio Costanın Azərbaycana rəsmi səfəri zamanı keçirilən görüşlərdə enerji əməkdaşlığı əsas müzakirə mövzularından biri olub. Prezident cənab İlham Əliyev çıxışında qeyd edib ki, Azərbaycan ilə Avropa İttifaqı arasında enerji tərəfdaşlığı yalnız təbii qaz ixracı ilə məhdudlaşmır. Dövlət başçısı vurğulayıb: “Enerji sahəsində əməkdaşlığımızın digər istiqaməti bərpaolunan enerji ilə bağlıdır və onun böyük potensialı var.”
Azərbaycan uzun illərdir Avropanın enerji təhlükəsizliyinə töhfə verən etibarlı tərəfdaş kimi tanınır. Xəzər hövzəsinin zəngin enerji ehtiyatları və mövcud enerji infrastrukturu ölkənin beynəlxalq enerji bazarındakı rolunu möhkəmləndirib. Bununla yanaşı, son dövrlərdə ölkə alternativ enerji mənbələrinin inkişafına da ciddi diqqət ayırır.
Xəzər dənizində külək enerjisi potensialı xüsusilə böyük hesab olunur. Mütəxəssislərin fikrincə, bu ərazi bərpaolunan enerji istehsalı baxımından regionun ən perspektivli məkanlarından biridir. Bundan başqa, Azərbaycanın geniş günəşli iqlimi günəş enerjisinin inkişafı üçün də əlverişli şərait yaradır. Bu imkanlar ölkənin gələcəkdə yaşıl enerji istehsalında mühüm rol oynaya biləcəyini göstərir.
Avropa İttifaqı isə iqlim dəyişiklikləri ilə mübarizə və karbon emissiyalarının azaldılması məqsədilə enerji siyasətində yaşıl transformasiyanı sürətləndirir. Bu səbəbdən Aİ üçün bərpaolunan enerji potensialına malik tərəfdaş ölkələrlə əməkdaşlıq xüsusi əhəmiyyət daşıyır. Azərbaycanla həyata keçirilən enerji dialoqu da məhz bu strateji məqsədlərə xidmət edir.
Bakıda keçirilən görüşlər zamanı tərəflər bərpaolunan enerji sahəsində birgə layihələrin həyata keçirilməsi, texnologiya mübadiləsi və gələcəkdə yaşıl enerjinin Avropa bazarına çıxarılması imkanlarını müzakirə ediblər. Bu təşəbbüslər yalnız iqtisadi əməkdaşlığı gücləndirmir, həm də ekoloji baxımdan dayanıqlı inkişafı təşviq edir.
Zərdab rayon Hüseynxanlı kənd ümumi orta ümumtəhsil məktəbinin müəllimi-Əfsun Nuriyev
