Müstəqillikdən sonrakı dövrdə Azərbaycan Respublikası iqtisadi inkişafın dayanıqlı modelini formalaşdıraraq regionda mühüm iqtisadi mərkəzə çevrilmişdir. Ölkənin strateji coğrafi mövqeyi, təbii ehtiyatlarının zənginliyi və iqtisadi islahatların ardıcıl şəkildə həyata keçirilməsi Azərbaycanı Cənubi Qafqazda lider mövqeyə gətirmişdir. Regional səviyyədə Azərbaycanın üstünlüyü, ilk növbədə, enerji resurslarının səmərəli idarə olunması və beynəlxalq enerji təhlükəsizliyinə verdiyi töhfə ilə ölçülür. Bakı-Tbilisi-Ceyhan və Bakı-Tbilisi-Ərzurum kimi qlobal əhəmiyyətli layihələr Azərbaycanın iqtisadi və geosiyasi nüfuzunu artırmışdır. Eyni zamanda, “Yaşıl enerji zonası”, Xəzər dənizində külək enerjisi potensialının reallaşdırılması və enerji diversifikasiyası istiqamətində atılan addımlar ölkənin innovativ inkişafına təkan vermişdir.
Qlobal miqyasda isə Azərbaycan iqtisadiyyatı bir çox beynəlxalq təşkilatların etibarlı tərəfdaşı kimi tanınır. Dünya Bankı, Asiya İnkişaf Bankı və digər qurumlarla əməkdaşlıq iqtisadi sabitliyin möhkəmlənməsinə xidmət edir. Qeyri-neft sektorunun artımı, ixracın şaxələndirilməsi və tranzit-logistika imkanlarının genişlənməsi ölkənin beynəlxalq iqtisadi sistemdə rolunu gücləndirir. Nəticə etibarilə, Azərbaycan regional iqtisadi liderlikdən qlobal iqtisadi nüfuza doğru inkişaf edən dinamik bir model formalaşdırmışdır. Gələcək mərhələdə rəqəmsal iqtisadiyyatın inkişafı, innovasiya və ixracyönümlü istehsal sahələrinin dəstəklənməsi bu üstünlüyün daha da möhkəmlənməsinə şərait yaradacaqdır.
Zərdab rayon Gəlmə kənd sakini-Səmid Səmədov
