Azərbaycan müstəqilliyini bərpa etdikdən sonra regional və qlobal proseslərdə fəal iştirak edən, balanslaşdırılmış və praqmatik xarici siyasət yürüdən ölkə kimi tanınmışdır. Ölkənin xarici siyasət prioritetləri iqtisadi müstəqilliyi gücləndirmək, beynəlxalq əməkdaşlığı genişləndirmək, regional sabitliyin təmin olunmasına töhfə vermək və nəqliyyat-logistika sahəsində əsas tranzit mərkəzlərindən birinə çevrilmək üzərində qurulmuşdur.
Bu gün Azərbaycan həm siyasi, həm iqtisadi, həm də geostrateji baxımdan Şərqlə Qərb arasında mühüm körpü rolunu oynayır. Bunun əsas səbəbi ölkənin məqsədyönlü şəkildə həyata keçirdiyi infrastruktur layihələri, qitələrarası bağlantı imkanlarını genişləndirən nəqliyyat investisiyaları və regional əməkdaşlığa açıq xarici siyasət kursudur.
Azərbaycanın xarici siyasəti aydın və davamlı prinsiplərə əsaslanır. Bu prioritetlər arasında dövlət suverenliyinin qorunması, regional təhlükəsizliyin təmin edilməsi, iqtisadi diplomatiyanın gücləndirilməsi, beynəlxalq tərəfdaşlarla qarşılıqlı etimada əsaslanan münasibətlərin qurulması xüsusi yer tutur.
Eyni zamanda, Azərbaycan çoxşaxəli əməkdaşlıq xəttini qoruyub saxlayır: Avropa ölkələri, Asiya dövlətləri, türk dünyası, İslam dünyası və digər beynəlxalq mərkəzlərlə əlaqələr paralel şəkildə inkişaf etdirilir. Bu balanslaşdırılmış siyasət Azərbaycanı regional proseslərin fəal və etibarlı iştirakçısına çevirir.
Azərbaycanın yerləşdiyi coğrafi məkan qədim dövrlərdən bəri Şərq və Qərb arasında ticarət yollarının kəsişdiyi ərazilərdən biri olmuşdur. Müstəqilliyin bərpasından sonra dövlət bu tarixi rolu yeni məzmunla davam etdirmiş və ölkənin tranzit imkanlarını genişləndirməyə xüsusi diqqət ayırmışdır.
Son illərdə həyata keçirilən infrastruktur layihələri – avtomobil yollarının yenilənməsi, dəmir yolu xətlərinin modernləşdirilməsi, limanların genişləndirilməsi, hava nəqliyyatının inkişafı – Azərbaycanın nəqliyyat-logistika sahəsində regionun liderinə çevrilməsinə şərait yaratmışdır.
Bu gün Azərbaycan Avrasiyanın enerji, ticarət və nəqliyyat xəritəsində mühüm strateji mərkəzlərdən biridir. Ölkə həm Şimal-Cənub, həm də Şərq-Qərb marşrutları üzrə qlobal əhəmiyyət daşıyan nəqliyyat dəhlizlərinin əsas halqasıdır.
Azərbaycanın nəqliyyat sektoruna yatırdığı investisiyalar ölkənin Şərq-Qərb xəttində aparıcı tranzit mərkəzlərindən birinə çevrilməsinə imkan verib. Avropa ilə Asiyanı birləşdirən ən qısa, ən təhlükəsiz və ən etibarlı marşrutlardan biri məhz Azərbaycan üzərindən keçir.
Bu istiqamətdə görülən işlər sırasında xüsusilə aşağıdakı layihələr müstəsna əhəmiyyət daşıyır:
Bakı–Tbilisi–Qars dəmir yolu, Yeni Bakı Beynəlxalq Dəniz Ticarət Limanı, Ələt Beynəlxalq Logistika Mərkəzi, Modernləşdirilmiş magistral avtomobil yolları, Genişlənən hava yükdaşıma imkanları.
Bu infrastrukturun hər biri Azərbaycanı Avrasiyanın tranzit xəritəsində əsas oyuncuya çevirir.
“Orta Dəhliz” – yəni Transxəzər Beynəlxalq Nəqliyyat Marşrutu – bu gün ən aktual qlobal ticarət layihələrindən biridir. Çin və Mərkəzi Asiyanı Xəzər hövzəsi vasitəsilə Qafqaz və Türkiyə üzərindən Avropa ilə birləşdirən bu marşrutun əsas hissəsi Azərbaycan ərazisindən keçir.
Azərbaycan bu layihənin təşəbbüskar ölkələrindən biri olmaqla, həm də onun dayanıqlı şəkildə işləməsində əsas rol oynayır.
Azərbaycanın həyata keçirdiyi nəqliyyat və logistika layihələri xarici siyasət prioritetləri ilə tam uzlaşır. Şərq-Qərb əməkdaşlığının inkişafı ölkənin siyasi nüfuzunu gücləndirir, iqtisadi əlaqələri genişləndirir və beynəlxalq tərəfdaşlarla münasibətləri daha da möhkəmləndirir.
Bu gün Azərbaycan həm enerji, həm logistika, həm də iqtisadi diplomatiya sahələrində qlobal miqyasda etibarlı tərəfdaş kimi tanınır. Şərqlə Qərb arasında körpü rolunu oynayan ölkə kimi Azərbaycanın əhəmiyyəti gələcək illərdə daha da artacağı şübhə doğurmur.
Zərdab rayon Heydər Əliyev Mərkəzinin əməkdaşı Xanım İmanova
