70 yaşı tamam olan Rusiya Silahlı Qüvvələrinin Baş Qərargah rəisi, ordu generalı Valeri Gerasimov vəzifəsində qalacaq.
Xeberaz.info xəbər verir ki, bu barədə “Vedomosti”yə Rusiya Müdafiə Nazirliyinə yaxın iki mənbə bildirib.
Onların sözlərinə görə, Gerasimovun hərbi xidmət müddətinin uzadılması barədə qərar “artıq qəbul edilib”.
Qeyd edək ki, 2021-ci ilə qədər general rütbəsi olan hərbi qulluqçular üçün maksimum xidmət stajı 70 ildir. Bununla belə, ayrıca qanun Rusiya Federasiyasının Prezidentinə Ali Baş Komandan kimi bu yaşa çatmış marşalların və generalların xidmət müddətini uzatmaq hüququ verir.
Xatırladaq ki, sentyabrın 8-də Gerasimovun 70 yaşı tamam olub. Həmin gün Rusiya prezidenti Vladimir Putin Baş Qərargah rəisini “Şücaət” ordeni ilə təltif edib. Gerasimov 2012-ci ildən Baş Qərargah rəisi vəzifəsini icra edir.
