xeberaz.info
Türkiyə İsveçdən NATO-ya üzv olmaq üçün üzərinə götürdüyü öhdəlikləri yerinə yetirməsini istəyir.
xeberaz.info xəbər verir ki, Türkiyə hakimiyyəti İsveçdən təkcə qanunvericilik dəyişikliklərini həyata keçirməsini deyil, həm də NATO-ya daxil olmaq üçün üzərinə götürdüyü öhdəlikləri və konkret əməli addımları yerinə yetirməsini istəyir.
Bu barədə Türkiyənin müdafiə naziri Yaşar Gülər bildirib.
Gülərin sözlərinə görə, Ankara NATO-nun fəal və konstruktiv üzvü olmaqda davam edir. Bunu təsdiqləmək üçün o, Türkiyənin Finlandiyanın Alyansa daxil olmasını ratifikasiya etdiyini diqqətə çatdırıb.
Nazir Danimarka və İsveçdə fəalların Quran nüsxələrini təhqir etməsi ilə bağlı insidentləri xatırladıb, həmçinin Kopenhagendə müqəddəs kitablarla “uyğun olmayan rəftarları” qadağan edən qanunun qəbul edilməsi faktını alqışlayıb.
Gülər, İsveçin Danimarkadan nümunə götürməli olduğuna işarə edərək, gecikmədən oxşar və konkret addımlar atılacağına ümid etdiyini bildirib.
Bundan əvvəl Türkiyə prezidenti Rəcəb Tayyib Ərdoğan Türkiyə parlamentinin İsveçin NATO-ya üzvlüyünü ratifikasiya edən qanun layihəsini təsdiqləməsi üçün ABŞ Konqresindən Türkiyəyə F-16 qırıcılarının satışı ilə bağlı addımlar gözlədiyini bildirib.
ABŞ prezidenti Co Bayden F-16-ların Türkiyəyə satışını dəstəkləyir, lakin Konqresdə hələ də bu qərara bir qədər etiraz var.