xeberaz.info
Cənubi Koreya Tunisdən nafta (nafta və ya ağır benzin, maye karbohidrogenlərin yanar qarışığı) idxalını artırıb. Refinitiv-in Reuters agentliyinə istinadən verdiyi məlumata görə, bununla paralel olaraq, Rusiyadan Şimali Afrika ölkəsinə nafta tədarükü kəskin artıb.
Rystad Energy tədqiqat şirkətinin vitse-prezidenti Maniş Seyvalın sözlərinə görə, qeyri-adi ticarət yolları Ukraynada hərbi əməliyyatların başlamasından sonra Qərb ölkələrinin tətbiq etdiyi anti-Rusiya sanksiyaları ilə bağlıdır.
Refinitiv-in ticarət axını məlumatlarına görə, dünyanın ən böyük nafta idxalçısı olan Cənubi Koreya 2021-ci ildə Rusiyadan 590 min ton yanacaq alıb. Lakin Qərb sanksiyalarının tətbiqindən sonra tədarük əhəmiyyətli dərəcədə azalıb.
Koreya Milli Neft Korporasiyasının (KNOC) məlumatına görə, oktyabr ayında Seul Tunisdən 740 min barel və ya təxminən 82 min ton nafta idxal edib. Refinitiv materiallarına görə, noyabrda Cənubi Koreya da Tunisdən təxminən 274 min ton nafta almaq niyyətindədir.
“Marşrutun dəyişdirilməsi əsasən Qərbin diqqətindən yayınmaq və daha ucuz Rusiya yanacağından istifadə etmək cəhdi ilə bağlıdır”, – Maniş Seyval bildirib.
Reuters yazır ki, Refinitiv məlumatları Tunisin bu ilin avqust-yanvar aylarında Rusiyadan 410 min ton yüngül distillə aldığını təsdiqləyir. Tunisin Energetika Nazirliyindəki adını açıqlamayan mənbə agentliyə bildirib ki, ölkə müstəsna olaraq nafta ixracı ilə məşğuldur. Ötən il Tunis Avropa ölkələrinə orta hesabla 21 min ton yanacaq ixrac edib.
Bundan əvvəl KNOC may ayında Rusiyadan neft məhsullarının idxalının 43,7% azaldığını bildirmişdi. Sonra Cənubi Koreya Rusiyadan bir il əvvəl 5,29 milyon barel əvəzinə cəmi 2,98 milyon barel xam neft idxal etdi.